Chin state thlanglei, Mindat khua ah April 26 zaanlei ah ralkap le khuami dirhmi mipi vengtu phu an i kap i ralkap lei in a tlawmbik minung 15 an thi tiah khuami nih an chim.
Mindat khua nichuahlei Kyuktuh le nitlakei Matupi khua lei kalnak lam ah an i kah hi si i palek le ralkap motor 3 zong an khanghpiak hna.
“Atu tiang ahcun kanmah mipi lei in a thimi an um rih lo. Anmah lei lawng an thi rih. Atu lio ahcun kahdohnak kan ngol rih,” tiah min langhter lomi mipi vengtu bu ah aa telmi pakhat nih a chim.
Chin Human Rights Organization zong nih tuni kahdohnak ah a tlawmbik ralkap 15 an thi tiah thawngthanhnak a tuah. Tuni kahdohnak a dih hnu ah Pakhuku in Mindat lei ah ralkap tampi an kuat hna ti zong aa tel.
Mindat khua ah sandahpiahmi mino 7 cu ralkap nih an tlaih hna i Pakhuku ah kuat an timh hna caah kahdohnak a can hi a si tiah khuami nih an chim.
Chinland Defense Force (CDF-Mindat) nih Mindat khua ah a ummi ralkap zung pakhat kan lak tiah thawng a thanh.
“Ralkap nih mipi nan tlaih, tukvelh le thah hna rih ahcun Chinram Runvennak Ralkap (CDF) nih a phunphun in kan in doh hna lai” tiah nizaan ah CDF nih thawng a thanh. – RFA Burmese
