Ramri Hngak Ralkap (BGF) aa timi Karen hriamtlai phu cu Chin ram i ZRA bang, mipi lei ṭang loin ralhrang Myanmar ralkap lei ah a ṭang. An sakhan ah Myanmar ralkap pawl he an umṭi i nizaan December 19 ah ralhrang dotu ṭangṭi hriamtlai phu KNU, PDF le KNDO an kah hna.
Mah ruangah Karen mipi 3,000 dengmang nunnak kawl in ramri tiva an tan i Thailand ram ah an zaam hna.
Zahan chun 12:50pm thokin Kayin/Karen state, Myawaddy peng, Lay Kay Kaw khua thar pawng Mae Htaw Talay khuate ah kahdohnak fak tuk a chuak.
Mae Htaw Talay khuate a uktu KNU, KNDO le PDF cu miphun rawitu BGF sakhan um ralhrang Myanmar ralkap pawl nih miakpi le hriamnam ngan torlecheng in an kah thluahmah hna.
Mah lio cun, aa bawmmi BGF ralkap le Myanmar ralkap 200 leng nih ke in Mae Htaw Talay khua cu rat pah in an kah thluahmah ve.
Mae Htaw Talay khuate ah miakpi le hriamnam ngan tamtuk an tlak caah khuami 3,000 dengmang cu nunnak kawl in ramri tiva a tan i Thailand ram ah an zaam thluahmah hna.
