Myanmar ram i amah tein aa ukmi Kokang ramkulh ah motor run phu 1 cu hriamtlai phu nih an kah i mipi 9 le palek 3 an thah hna, tiah Kokang Ralkap Bawizik Zung nih a thanh.
Motor run cu Kokang Cozah chungtel hlun a simi U Khin Maung Lwin nih a hruaimi asi. Lashio khua in Kokang khualipi Laukkai lei ah an kal lio, zahan zaanlei ah Myanmar National Democratic Alliance Army (MNDAA) nih a kah hna.
Mipi 9 le palek 3 an thih pinah mipi 8 le palek 5 zong hliam an tuar.
MNDAA cu Myanmar ralkap he aa kap tawnmi an si nain, February 1 ah Myanmar ralkap nih NLD uknak a chuh cangka in February 28 tiang ral kan i tu lai lo tiin a thanh caah atu lio cu an i kap lo.
Ralkap nih uknak a chuh cangka in Myanmar ram cu buaibainak a chuak thluahmah.
