Singapore ram ah sinum a ṭuanmi Zin Mar Nwe nih a boss nu anu kum 70 cu namte in a sawh thah, tiin November 9 le 10 ahkhan Singapore High Court ah taza an cuai.
A thah hi 2018 June thla ahkhan asi cang nain nizaan tihni November 9 ahkhan Singapore High Court ah taza an cuai caah Singapore media pawl nih a thar in an ṭial ṭhan hi si.
A thah lio ahhin Zin Maw Nwe cu kum 23 hrawng asi lai tiah an rak zumh. Nain, Tan Tock Seng Hospital ah a ruhkhua an check i kum 17 ruhkhua lawng asi. Singapore ram ah sinum ṭuan dingin a kum tlin lo caah puaisa nih lih in kum 23 in hmatpungṭin an rak tuahpiak mi asi.
Zin Mar Nwe cu Singapore Lainawn Upadi Dal 300(c) in taza an cuai. Thah (thih dan pek) khawhnak upadi asi. A vanṭhat ahcun thah loin nun chung (thih hlan lo) thongthlak tu aa huah kho men.
Zin Mar Nwe cu 2018 in atutiang hi Singapore cozah nih thong a thlak peng. Nizaan tihni cu thonginn thilraang he biaceihzung ah an rat pi.
“Namte in voi tampi ka sawh i a thi, tiin palik sinah a thahmi aa phuan cang,” tiah tazacuaitu cozah sihni pawl nih biaceihzung ah an chim.
Tarnu nih aa ka velh lengmang
Zin Mar Nwe cu 2018 May thla in hi hna chungkhar sinah sinum a ṭuan. A boss nu hi a vapa le kum 13 leng asi cangmi fanu 2 he khuasami asi.
Zin Mar Nwe cu hi hna chungkhar sinah inn rian, thilsuk le rawl chuan a ṭuan.
Zingka 5:30am in rianṭuan aa thok i 11pm tiang. Myanmar um a chungkhar zong phone chawnhnak nawl an pek i thla 1 ah lahkhah S$450 an pek. Tlawmpal cu sinum puaisa nih a leiba an tlaih. Mah tiang hi cu zeihmanh piahtana a um lo.
May 26 ah a boss nu anu cu India ram in a hung phan. Thla 1 hrawng caam aa tim.
“Mah tarnu nih hin chungkhar minung dang hmuh lo kar ah aa ka tukvelh lengmang,” tiah Zin Mar Nwe nih a chim.
“Rian aa ka fial peng. Ukang a sami in aa ka khangh. Rawlchuannak thilri in ka lu, pum le kut ah aa ka tuk. A ketin ka tan lio ah ka ṭang ah aa ka chuih,” ati.
Sinain, Zin Mar Nwe a takpum cu sibawi nih an check i ukang sami in duahnak le tuknak, tbk hma pakhat hmanh an hmu lo.
Namte in voi 26 a sawh
A thah ni ahhin Zin Maw Nwe le tarnu cu inn ah anmah lawngin an um. Adang cu 11:30am ah leng an chuak dih cang.
“12:15pm hrawngah tarnu nih a hung ka rat hnawh i ‘thaizing cu puaisa sinah kan khirh lai’ tiin aa ka hro,” tiah Zin Mar Nwe nih a chim.
Thil sining a hlat tu palik nih, “Mah ruang cun Zin Mar Nwe cu a thinhung i a orhlei kut in namte aa lak i tarnu a cawl ti lo tiang a sawh peng. Tarnu nih a nam len nain a nam kho,” tiah an chim.
“Namte ka tlaih i ka sawh lio ahhin ka lungfim lo tiin Zin Mar Nwe bia kan hal lio ah a kan chimh,” ati. Zin Mar Nwe nih tarnu a sawh lio ahhin tarnu cu mileng khan ah a zau i TV a zoh lio asi.
Tarnu pum ah namte sawhnak hma 26 a um.
Mah hnu ah, Zin Mar Nwe nih a thil lak i zaam dingin master khaan thil vialte a leh dih i bizu tawh zong a hrawh nain a passport a hmu lo.
Mah hnu ah namte cu coka ah a ṭawl i a chiah. A thil aa thlen i tangka tlawmpal le tlanglawng citnak card aa put i inn cu a zaamtak.
Inn pawngah ummi a puaisa sinah a kal i passport a hal hna. Nain puaisa pawl nih a boss chawnh an timh caah a chuak ṭhan. Mah hnu ah bus le tlanglawng in hmun tampi ah a kal. Bukit Merah Central Hawker Centre zong a va phan i cuka ah rawl a ei.
Zaanlei 5:30pm hrawngah taxi in puaisa zung ah a kir ṭhan. Puaisa zung rianṭuan pawl nih palik an chawnh i an tlaih.
Taxi chungah S$114 a ummi tangka bawm a kal tak. A mongtu nih a va pek nain ‘keimah ta asi lo’ ati.
Sibawi nih bag le tangka ah aa nehmi thi an check i Zin Mar Nwe thi asi.
2018 thokka le tukum thokka zongah Institute of Mental Health sibawi Dr Alias Ligo nih a check i ‘a thluak hman lomi si lo, punghman minung asi ko’ ati.
Nain, ni kum i private sibawi Dr. Tommy Tan nih a check lio ahcun ‘lungretheih le lungrawhnak ruangah a thluak hman lo’ a rak ti.
‘Tarnu a rak thah lio zong ahhin a thluak hman lo’ ati.
A thluak hman tak lo ahcun biaceihzung nih dantatnak neem deuh a pek te khawh men.
Nain, tazacuaitu cozah sihni pawl nih, “Dr Tan nih a chimmi pawl hi Zin Maw Nwe nih a chimmi aa charhchan chommi lawng asi. Mah ni i Zin Mar Nwe a um tu ning puaisa zung nih an chimmi he zong aa kalh,” an ti.
