Myanmar ralkap nih February 1 ah uknak a fir thok in atutiang thla 2 fai chungah Chinmi 21 bak a thah cang hna, tiah Chin Nuhrin Covo Bu (CHRO) nih a thanh.
Kalay ah ummi Chin nufa Pi Cin Ngaih Don, kum 55 le a fanu Zen Deih San Hawm Vung, kum 15 lebang cu ralkap bu nih an tlaihhrem hna hnu ah an thah hna. An thil tuah hi minung zong an si lo.
Cun, atutiang ah Chinmi 179 a tlaih cang hna. Tam deuh cu a thlah cang hna nain 67 cu atutiang thong a thlak peng rih hna.
Mah pinah, Chinmi nih kan bochan mi hna awṭha minthang, muidawh, MP, mi fimthiam 30 leng tlaih dingin nawl a chuah rih caah lungrethei in an um hna.
Tlaih dingin a kawlmi Chinmi lakah; Sung Tin Par, Zung Cer Mawi @Thet Mon Myint, Benjamin Sum, Ni Len, Yaw Kee, Chaw Su Khin, tbk zong an i tel. Atang hmanthlak ah tling tein zoh khawh asi.
CHRO hruaitu Salai Bawi Lian Mang nih, “Chinmi 21 Min Aung Hlaing te ralhrang phu kut in an thi cang. Chinmi 179 an tlaih hna. A cheu an thlah hna na in minung 67 tongin ah an hren rih hna. Muidawh, minthang, hlasak thiam, MP cheukhat le mi fimthiam mipi nih kan bochan mi 30 tlaihding in an min an tar.
“Tedim ah CDM a tuahmi pakhat an tlaih khawh lo ruang ah a nu le apa cu ralsa tarh in Kawl ralhrang nih an tlaih hna. Hi an thil tuahmi hi Mafia na in a sual deuh mi thil tuah asi.
“An thil tuahmi vialte kan zoh dih, kan ngiat dih. A za cikcek cang tiah mipi nih kan ti caah mipi kan tho lai.
“A au kho kan au lai, CDM atuah kho kan tuah lai, ramkip cozah a sawm kho nih kan sawm hna lai, a kap kho nih kan kah hna lai, I a do kho nih kan doh hna lai. Chuncaw a fun kho nih chuncaw kan fun lai, mah le ti khawh nak lam cio in kan tangtti lai,” ati.
