Uknak firtu Min Aung Hlaing a ralkap pawl nih nizaan December 18 ah Kayah state i Loikaw peng, Naunglon khuate ah inn 20 hrawng an duah khangh.
Zahan zingka 11am hrawngah minung lungput a keng lomi Myanmar ralkap pawl nih hriamnam ngan 120 mm miakpi in Naunglon le Kunnar khuate an kah hna i zaanlei hrawng ahcun khua chungah an hung lut, tiah khuami pakhat nih a chim.
“Hriamtlai pawl he an i kah hnu ah Myanmar ralkap pawl cu khua chungah an lut i inn khat hnu inn khat an duah thluahmah.
“Inn 20 lole 30 hrawng an duah hna. Kunnar khua zong ah inn tlawmpal an duah. Khua chungah ralkap an um rih caah inn an duahmi zat hi fiang tein kan hngal kho rih lo,” ati.
Kayah khualipi Loikaw in meng 21 hrawng aa hlatmi Naunglon le Kunnar khuate ahhin Myanmar ralkap phu LID 530 chungtel ralkap 200 fai an lut, tiah khuami nih an chim.
Inn 100 hrawng a simi Naunglon khua ah inn 20 hrawng le facang an chiahnak kudawng pawl an khangh piak hna.
Naunglon pawng khuate 5 i khuami 1,000 hrawng cu nunnak kawl in ramtang ah an zaam hna.
Mahka hrawng khuami pawl cu facang le fangvoi lo in aa cawmmi an si.
Mah kong he pehtlai in a thimi le hliam tongmi an um/lo cu atutiang hngalh khawh asi rih lo.
