Zarhteni ah Myanmar ralkap nih Mandalay ah buai lo tein sandahpiahtu minung 2 an thahmi hna cu United Nations (UN) nih fak piin a mawhchiat.
UN lutlai Secretary General Antonio Guterres nih, “buai lo tein sandahpiahtu pawl thah cu kan cohlang hrimhrim lo,” tiah Myanmar ralkap cu a mawhchiat.
“Buai lo tein sandahpiahtu pawl thah, le hnahnawhnak pek le tlerh cu kan cohlang kho lo,” ati.
Zarhteni ah Mandalay ah sandahpiahtu pawl cu ralkap le palek nih meithal kuan taktak in an kah hna caah “minung 2 an thi” tiah hliamtuar zohkhenhtu Hlaing Min Oo nih a chim.
“Minung 30 hrawng meithal kahnak hma an tuar rih, tam deuh cu meithal kuan taktak in kahmi an si,” ati.
Mah lio cun sandahpiahtu minung 12 hrawng an tlaih hna.
“Ka vapa an velh i an kah. Lamkam ah a dir i sandahpiahtu a zoh hna. Ralkap nih an tlaih i an kalpi,” tiah Mandalay khuami pakhat nih RFA thawngla sinah a chim ve.
Kan hnu zarh zongah Naypyitaw ah Mya Thwate Khaing, kum 20 cu palek nih alu ah meithal in an kah i sizung ah lungfim loin a um hnu ah a nunnak liam.
Atutiang ah ralkap nih minung 4 an thah cang hna, tiah Irrawaddy tadinca nih a thanh.
February 1 ah ralkap nih NLD uknak an chuh hnu in atutiang ah minung 570 hrawng an tlaih cang hna.
Uknak chuttu ralkap bawizik Min Aung Hlaing le a changtu pawl cu US, UK le Canada nih an ram tlawn an phih hna i an ram um an chawva vialte an kharpiak dih hna.
February 1 zingka dei hlan ah ralkap nih an tlaihmi Pi Aung San Suu Kyi cu ralkap nih lih hrokhrawl in taza an cuai i March 1 ah biaceihzung ah an chuahpi te lai. Atu cu ralkap nih an hren.
