Kum 19 ngaknu Ruth Par Tin Dim @Angelina Ruth cu a ra laimi July thla chungah Myanmar ram aiawh in Philippines ah Miss Teen Tourism 2020 aa zuam lai.
Miss Teen Tourism 2020 cu ni kum ahkhan tuah ding asi nain COVID-19 pulrai ruangah tu kum July thla ah an thawn.
Philippines ah Myanmar ram aiawh in miss aa zuam ding thimnak ‘Miss NewFace Model International 2020’ ah Kachin state aiawh in aa zuam i teitu/winner asi caah Philippines khualipi Manila ah Myanmar aiawh a timh hi si.
Pe 5 le letmah 6 a sangmi samthleirem Angelina Ruth nih, “Philippines ram in teinak luchin he ka rak tlung kho te lai ti hi ruahchannak ka ngei ko. Aruang cu atulio kan ram buai lio ah har taktak in kan i zuamnak kha Pathian nih a kan theihpiak lai i teinak a kan pek lai ka zumh,” tiah The Hakha Times ah a chim.
“Cun, Chin G-Z pawl upat kan pek hna. Nunnak a pe cang mi hna zong kan upat tuk hna. Miphun le ram ca ah nunnak nan thaap mi ka hmuh tik ah kan upat khun hna. Teinak kan hmuh hlan tiang hmai ah kalti rih usih. Keimah zong mizapi nih cu hlan nakin thazaang nan ka pek i nan ka dirpi rih naklai kan nawl hna,” tiah a chimchap.
“Miss Angelina Ruth cu Hakha khuami Pu Thla Ceu le Thantlang Peng Tluangram khuami Pi Sui Dawi (Doi) hna i an fale 5 lak ah 3nak a si. Hakha ah khua an sa,” tiah The Hakha Times nih a langhter.
Ni kum zongah City puai fa deuhmi miss zuamnak ah Kachin state aiawh in aa zuam i 2nd runner up a ngah.
