Kum 5 ngakchia nute a tlaihhrem hnu ah that tu pa cu Ta’ang hriamtlai phu TNLA nih thih dan a pek i mipi hmai ah meithal in a kah thah.
Myanmar ram, Shan state chaklei um Namsan peng, Loi Khale khuate ah kum 5 ngakchia nute cu kum 25 pa Mai A Pat nih a tlaihhrem, mah khawh cun a thah.
Ta’ang Miphun Luatnak Ralkap (Ta’ang National Liberation Army – TNLA) nih thil sining a hlat hnu ah a dikmi si ko ati i thih dan a pek. Mah hnu ah mi zapi hmai ah meithal in a kah thah.
TNLA biachimtu ralbawi Mai Aik Kyaw nih, “A dikmi si ko. Mah pa hi 2021 ah uknak firtu Myanmar ralkap nih an ngaihthiam i thong in an thlahmi si,” tiah a chim.
“Khua a phak in ni 23 lawng a rau, mah hnu ah atu bantuk thil a tuah ṭhan. Hlan zongah mah pa nih kum 54 nu le kum 4 ngakchia nute a rak tlaihhrem cang hna.
“2018 ah mi a thah hna ruangah palek nih an tlaih i Kyaukme peng biaceihzung nih kum 7 thong dan a pek. Kum 2 hmanh a tlak hlan ah ralhrang ralkap nih an ngaihthiam i an thlahmi si,” ati.
TNLA biaceihnak zung nih April 1 ah thil sining a hlat.
A tlaihhrem pinah a thah taktak ko ti fiang tein a hngalh caah mi zapi hmai ah dantatnak fak bik a simi thih dan a pek i meithal in a kah thah.
