Tuni, January 27 thokin state dang veve ah a ummi nuva pawl cu i tlawnnak nawl kan pek cang hna, tiah Malaysia cozah nih a thanh caah mi tampi an nihchuak tuk.
Nuva lawng bak i tlawnnak nawl a pek hna. Midang hohmanh state dang kalnak nawl a pe hna lo. Mah ruangah mipi an nihchuak tuk i an i capo len.
“State dang veve ah ummi nuva pawl nih cozah sinah a kan hal caah state dang um an nupi/va le fale he i tonnak nawl kan pekmi hna asi.
“Nain, mah nawl in kal colh a ngah lo. Palek sakhan ah nawl an hal hmasa hnu lawngah kal khawh asi lai,” ati.
Malaysia mipi an nih chuak tuk
Malaysia Tuluk pa Choong nih, “nuva thengte state dang ah vai i tlawnnak nawl pek cu ka lungfiang kho bak lo? ….. maw an ngaih tuk? Pulrai a daih hlan cu video call zong ngah ko cuta,” tiin a comment.
Malaysia nu Lyna nih, “nuva thengte state dang kalnak nawl pek cu ka lungfiang kho bak lo. Zeihmanh sullam a ngei lo eh. Va ka ngeih rih lo ruangah maw si hnga, nain chungkhar cu ka ngei ve ko.
“Ka chungkhar ka hmuh hna lonak thla 8 bak asi cang. Nuleva i dawtnak hi fale nih nulepa kan dawtnak hna nakin a biapi deuh nan ti duhnak maw si?
“Silole, COVID nih single pawl lawng a tlunh hna nan ti duhnak dah?,” tiin Facebook ah a comment.
Che Ali nih, “pulrai doh kongah kan cozah zeitluk in dah a hruh i san a tlaih lo ti cu mah nih hin a langhter. Kan cozah a hruh khawh ning hi cu zumh hmanh a har. Thimnak tuah tikah mah hi philh hlah uh,” ati ve.
Malaysia Tuluk pa Yip Cheng nih, “state dang cio ah nupi 4 ka ngei. Atu cu an umnak state 4 ah ka kal kho cang lai tinak si. Dawt, rak ka hngak,” tiin capo a saihnak.
