Rammi Lungrualnak Cozah (National Unity Government – NUG) nih, “Uknak firtu ralkap bawizik Min Aung Hlaing cu Indonesia ram ah ASEAN meeting kai dingin a kal tikah kan tlaih piak uh” tiin INTERPOL sinah ca a kuat.
Thaizing hi Indonesia khualipi Jakarta ah Myanmar buainak kong lakhruak meeting tuah an timh. Min Aung Hlaing zong meeting kai ve dingin an sawm caah atu bantukin NUG nih INTERPOL sinah ca a kuat hi si.
INTERPOL cu misual tlaihnak caah vawlei cung ram 194 palek i bawmhnak bu asi. Tahchunnak ah, US nih misual pa tlaih a duhmi kha ramdang ah a um ahcun INTERPOL chungtel ram 194 palek pawl kha bawmh a hal khawh hna.
NUG nih, “Ralkap cozah hruaitu Min Aung Hlaing cu UN biaceihzung ICJ le ICC ah kuat i tazacuai dingin kan tlaihpiak uh” tiin INTERPOL sinah ca kan kuat, tiah thawng a thanh.
“April 24 ah, Indonesia khualipi Jakarta ah tuah ding Myanmar kong ASEAN meeting kai dingin a phak tikah rak kan tlaihpiak uh kan ti hna.
“Ca cu NUG cozah Ramchung le Lahwahkah Vuanci U Lwin Ko Latt nih a kuat.
“UN nih Rakhine state um Rohingya thahnawnnak kong a hlat i 2018 September 12 ah ‘Min Aung Hlaing cu miphun cihmihnak a tuahtu si’ tiin cathanh a rak chuah cang,” ati.
Nain, Aung San Suu Kyi nih ‘kan ram ah miphun cihmihnak a um lo’ ti bakin UN biaceihzung ICJ ah a rak chim (ralkap a ven) kha awh. NLD le Kawlrammi vialte Suu Kyi (ralkap) lei kan ṭang dih khah. NUG cozah dirhtu zong cu NLD MP CRPH asi. Atu vial ah UN le Rohingya lei kan ṭang ṭhan i khat lei cun a zoh kan chia ngai. Thil dik ṭanh loin mah miatnak lawng a ruatmi kan lo. Suu Kyi nih kha lio ah Rohingya ṭanpi loin ralkap a ṭanpi mi kha aa palh taktak. Mah ruangah ramdang nih an pek cia laksawng vialte an chuh dih, an huat dih. Amah tein lam aa phih dih.
“2021 February 1 ah Min Aung Hlaing nih kan ram uknak a fir i buainak tel lo tein sandahpiahtu mipi le CDM a tuahmi mipi nuai tampi a tlerh, tukvelh, tlaih, hrem, thah peng hna. Minung 3,331 a tlaih cang hna i 739 a thah cang hna,” tiah NUG nih INTERPOL ca a kuatmi chungah a ṭial chih.
Nain, hiti menmen cun INTERPOL nih Min Aung Hlaing a tlai lai lo ti cu NUG hruaitu pawl nih an hngalh tuk ko lai, Min Aung Hlaing kan cohlang lo ti langhternak caah le a thangchiatnak caah an kuatmi asi. INTERPOL nih an tlaih/lo cu tu zarh chungah a fiang ko lai.
