Update: Tangka ting 10 leng a kan bawmtu hi amah Rosie Bawi Tha Par pumpak si loin amah dirhmi sianginn Cross Academy siangngakchia an si, tiah Vanzangtlang Siangngakchia Chungkhar (VSC) nih tuni ah a remh. Nizaan ah Rosie Bawi Tha Par nih bawmhmi in an ṭial sual caah tuni ah an remh hi si. Atanglei hi nizaan an ṭialmi charhchan in kan ṭialmi asi.
US ram Indianapolis khua ah ummi nungak Rosie Bawi Tha Par nih Vanzangtlang khua 6 um Chin ngakchia hna sianginn kainak caah tangka ting 10 leng (1,015,000 MMK) a hlut.
Chin National Front (CNF) sakhan lubik Camp Victoria pawngum Vanzangtlang khua dihlak (6) cu CNF thantar thlai in le ram hla caah ‘A Hme Ram Laitlang’ sa in sianginn an on dih cang. University siangngakchia pawl nih lahkhah lo tein zaanghleicawi in ca an chimh hna.
Mah thawngpang nih cun US um nungak Rosie thinlung a suk tuk i ngakchia hna cauk le ballpen cawknak caah rethei ngai in a hmuhmi tangka ting 10 a kuat hna hi si.
Rosie hi ram le miphun a daw ngaimi si. Kawl Ralkap nih February 1 ah mipi thimmi cozah uknak an chuh hnu in a umnak US ram ah sandahpiah peng ve.
Cun, naite July 25 zong ahkhan amah dirhmi Cross Academy School (USA) in COVID-19 in a zawmi Kawlram um Chinmi hna caah tangka ting 14 leng (1,410,000) an hlut.
Rosie cu Thantlang peng, Tlangpi khuami Evan Pu Mang Cung Nung le Pi Thong Thluai hna i an fanu asi.
Rosie cu US lawng si loin vawleipumpi Chinmi nih theih ngaimi le zoh lengmangmi Chin Tube ngeitu asi.
Vanzangtlang Siangngakchia Chungkhar thithruainak in on mi Vanzang sianginn cu zarhkhat ah nili sianginn an kai. Zaan ah Tangnga in Tangriat tiang ca zohṭi nak (7:00-9:00 pm) tiang an ngei. Tangkhat in tanghnih tiang caṭial cawnnak (7:00-8:00pm tiang) an ngei i tangthum in tangli tiang cafangfonh cawnnak (7:00-800 pm tiang) an ngei.
Vanzang khua an thil tuahmi cu thil ṭha taktak a si i cawn awk tlak zong a si.
Vanzangtlang Chin ngakchia hna him tein sianginn an kai khawhnak hnga atanglei zulhphung 5 an chuah
Vanzangtlang Siangngakchia Chungkhar nih Vanzangtlang ah sianginn kan on cang bantuk in kan fanau le an tlau nakhnga lo pehzulh tein le tluang tein sianginn kan kai khawh thai nakhnga a tanglei zulhphung hna cu Vanzangtlang khuakip nih na kan zulhpiak naklai zaangfah kan in nawl hna.
1. Vanzangtlang mipi kan zate Covid pulrai in kan i ven khawh nakding ah Vanzangtlang khualeng ah chuah a ngah lai lo.
2. CNF/CNA le CDF tel loin Vanzantlang mipi luhchuahnak cu caankarlak kan kham.
3. Vanzangtlang chung ah mithiruak i tlunkalpi a ngah hrimhrim lai lo.
4. A herh tuk mi thil zeipaoh i chanh ding a um ahcun Vanzang Camp (Camp Venbo) tiang lawng i pekchanh a si lai i zaankhat a riah hnu lawng ah hlam khawh a si lai.
5. August 4 in August 24 tiang milut le michuak Vanzangtlang chung kan kham.
