US hrambunh electric mawṭaw company Tesla le rocket company SpaceX lutlai Pu Elon Musk, kum 49 cu Amazon company lutlai Pu Jeff Bezos lonh in vawleicung mirumbik asi cang.
Nizaan le tuni ah Tesla share man 4.8% a kai caah Tesla company share dihlak man $700bn leng bak a phan. Mawṭaw company dang; Toyota, Volkswagen, Hyundai, GM le Ford dihlak fonh nakin a rum deuh cang.
Tesla share man a kai tuk ruangah Pu Elon Musk tangka cu vantawng bakin a kai ve. Tesla company share 241 million hi Pu Elon Musk ta asi. Mah ca kan ṭial lio hi Tesla share $816.04 asi. 241 million x $816.04 = $196 billions.
2017 in nizaan tiang vawleicung mirumbik asi pengmi Amazon company ngeitu Pu Jeff Bezos cu 2nak ah a tla. A tangka ngeihmi $185B asi.
3nak cu Microsoft company dirhtu Pu Bill Gates, $134B asi.
Vawleicung mirumbik Pu Elon Musk nih, “ka tangka acheu cu vawlei i harsatnak remhnak caah ka hman lai, a taangmi acheu cu, vawlei i dinosaurs vialte a rak that dihtu vanlung nih vawlei a tlak ṭhan silole Vawlei Ralpi 3nak a chuah sual i kanmah tein kan i hrawh sual ahcun kan vawlei a rawh lai caah planet Mars ah a hmunmi khuapi sernak caah ka hman lai,” ati.
Tesla Share Cawk a Phu Lai Maw?
Biahalnak nganpi pakhat ummi cu, US um Chinmi caah atu lio hi Tesla share cawk a phu lai maw? timi hi si.
Hmailei kong cu hohmah nih aamahkhan khawh asi lo i ruahdamh cio asi, palh caan um i hmaan caan a um.
Kan theih cio bang, January 20, 2021 cun US president cu Joe Biden (Democratic) asi cang lai. US Hluttaw Niam (House) zong Democrat nih an uk i Hluttaw Sang (Senate) zong Democrat nih an uk rih lai.
Democrats cu green energy (renewable energy) tha a pe tukmi le carbon dioxide tamtuk a chuah i kan vawlei a linhter tu petrol (datsi) tha a pe lomi an si.
Cucaah, a ra laimi kum tlawmpal chung cu electric mawṭaw cawk dingin US cozah nih upadi tampi a ser lai i electric mawṭaw a cawmi pawl cu tax credit zong a pek hna lai, tikah Tesla mawṭaw a man chinchin lai i an share man a kai chin lengmang lai i tu hnu kum 10 cun a thong leng phan te lai, tiah thiamsang tampi nih an zumh.
Mah ruang cun atu ah Tesla share cawk hi a sung lai lo, tiah zumh cio asi. Nain, share man a fah tuk cang caah share tampi a caw kho lo ding tangka tampi a ngei lomi caah cun a phu leem hnga lo.
Petrol rawn lomi, phone bantukin battery tunmi electric mawtaw Tesla video
