Puchong Tesco sang ah a ummi Pu Sang Ceu, kum 29 nih nizaan August 14 ah Serdang Sizung ah COVID-19 in a kan liamtak.
A nupi le an fale 2 a kaltak hna. An fale an ngakchia tuk rih i tantakmi a nupi le an fale zoh ah ngaihchiat a zual tuk hringhran. A nupi zong hi a dam pah ve lo i a kuahnak sau cang caah a derthawm tuk lio asi (a cungbik hmanthlak khi cu 2017 lio an i thlakmi si).
A nupi le an fale cu nizaan ah COVID-19 an i test colh i Pathian dawtnak thawngin an thiang (negative an si).
Kan biak Pathian tu nih tuar khawhnak pe hna sehlaw dongcat loin umpi zungzal ko hna seh, tiah thla kan campiak hna.
Pu Sang Ceu @Khun Khun pa hi Thantlang peng, Vanzang khuami asi. Malaysia um Vanzang khuami chungin anih hi COVID-19 in vanchiat a tong hmasa bikmi asi.
A rianṭuan hawi Thang Te Thantlang nih, “Khun Khun pa he hin naihniam hawikom cu kan rak si lo nain a upa Ceu Hmung tu he hin sianginn (Saydanar boarding school) kai ti khat kan rak si.
“Pumh khawh khawh caan ahhin an chungkhar tein Batu 14 sang um CCF Puchong biakinn ah an rak i khawm lengmang. An fanu Khun Khun hi duh a nun tuk caah ka capo piak lengmang hna.
“Cuticun ai naihniam ah kan cang hna. 2019 lio ah Mid Valley Office caah wire kan tuan lio ahhin Khun Khun pa zong ruah lo pi khin an Boss pa le a tuanti hawile he tiin kan rak tuanti hna. Afel kho tak khi si.
“Cuticun i dinh caan ah a upa Ceu Hmung he sianginn kai ti kan sinak le a dangdang pawl… Vanzang khuami kan chungkhat kong bia ka rak ruah tawn…. Then vialte lakah a fakbik mi hi thihnak nih tthen hi asi hrim ko. Apoituk kan in siang hrim lo ee.
“Ngaihchiatnak a tongmi chungkhar le nufa rual nan ngaihchiatnak thilrit hi Pathian tu nih in chawng ko hna sehlaw,” tiah a ngaihchiatnak a ṭial.
