Myanmar ralkap nih an tlaihmi nu Ma Khin Nyei Thu, kum 31 cu a chiaṭha thi chuak dihlak in ralkap nih an hrem, tiah thongin a chuakmi Ma Shwe Yamin Htet, kum 17 nih RFA sinah a phuan. Mah kong cu The Irrawaddy media zong nih vawleipi theih dingin Mirangca in a ṭial.
Yangon ah bomb tampi a puak i ralkap pakhat a thih hnu April 17 ah Ma Khin Nyein Thu, kum 31 le Ma Hsu Linn Htet, kum 19 le pa 4 cu ralkap nih an tlaih hna i Shwepyithar peng ralkap biahalnak inn ah an hren hna.
Mahka cun, Ma Khin Nyein Thu le Ma Shwe Yamin Htet cu khaan 1 ah an chiah hna. Ma Shwe Yamin Htet cu kum tlinglo asi ruangah naite khan an thlah. An thlah hnu zong cun inn ah a um ngam ti lo i hmun dangah a zaam. Aa thuhnak hmun in, thil sining cu April 21 ah a Facebook ah a phuan pinah RFA media sin zongah a phuan nolh.
Ma Khin Nyein Thu cu ralkap nih an velh peng, tiah a chim.
April 17 ah, a tlangvalpa ramdangmi asi an hngalh i Yankin palek sakhan bawi pawl nih Ma Khin Nyein Thu cu an auh i a vaang an karter, a chiaṭha an chuih, a chiaṭha cu fung in an tuk, tiah Ma Shwe Yamin Htet nih a chim.
“Biahalnak inn ah kan sin a hung kir cun a chiaṭha thi chuak dih. A thi rat lio si lo.
“A pumpuluk in an velh i an hrem caah a fak tuk i lam zong a kal kho lo, rawl zong ṭhaṭhi a ei kho lo.
“A hmur zong tlek dih lak in an velh caah rawl a ei kho lo.
“Ma Khin Nyein Thu cu Shwepyithar ralkap biahalnak inn zongah ni fatin zingka 6am in zaanlei 1pm tiang bia an hal peng. Zaan zongah bia an hal peng.
“A hma cu sii thlopnak nawl zong an pe lo.
“Bia an hal chung vialte cu chun he zaan he rawl zong an pe lo. An tlaihka ah palek sakhan ah fak tukin an hliamh ruangah Shwepyithar ralkap biahalnak inn an kuat cun a ngandam ti lomi si. Hiti ningin ni fatin bia an hal peng ahcun a nunnak caah thinphang asi (a thi kho men),” ati.
A fanu tuarnak kong a theih hnu ah, Ma Khin Nyein Thu anu Daw Hla Hla Soe nih, “A caah thla ka cam peng. Zei dang kai ruahchan lo nain nun tal cu nung seh (thi hlah seh) ti ka duh,” tiah The Irrawaddy ah a chim.
Ma Shwe Yamin Htet nih, “Pa pawl zong khaan dangah bia an hal hna hnu cun ṭhaṭhi in an kal kho lo,” tiah a chim.
Ma Shwe Yamin Htet le anu cu April 14 sandahpiah lio ah palek nih an tlaih hna i April 15 in 20 tiang Shwepyithar biahalnak inn ah an hren hna.
“Keimah zong April 14 an ka tlaih lio ah Sanchaung palek sakhan ah bia aa ka haltu palek bawi nih sualpi ding le thah dingin aa ka tlerh,” tiah a chim.
“Ka liang ah ding tein aa ka bengh i, na duh cun kan thlah lai aa ka ti. Voi 2nak aa ka lem ah a kut ka bengh i palek nu ka auh. Thin hung takin aa ka meet i, ka duh cun fawi tein kan thah lai i na ruak cu a thli tein ka hlonh khawh aa ka ti,” tiah RFA interview ah a chim.
A tang RFA interview video zongah ngaih khawh asi.
