March 17 ah Kalaymyo ah sandahpiahmi pawl cu ralkap le palek nih meithal in an kah hna i Chinmi 3 an thah hna.
Kalaymyo Taungphila sangum Salai Cung Lian Ceu, kum 25 cu “ralkap nih sandahpiahmi an kah hna” ti thawngpang a theih caah sandahpiahnak kalmi a nau nu khamh dingin a kal lio ah NyiNyiTun lakphak dawr hmai ah an kah.
Sizung kuat an timh nain palek nih mawṭaw in an kham hna caah tuan ah an phakpi kho lo. A ṭang ah an kah i a cuap khen caah a thihnak si, tiah kan theih.
Salai Cung Lian Ceu cu Mandalay khua ah Pathian rianṭuanmi asi i Kalay a tlunnak ni 5 lawng si rih.
Kalaymyo Tahan sangum AG biakinn hmai ah tlangval Do Suan Kim, kum 20 cu ralkap le palek nih an kah thah i a ruak cu ralkap le palek nih an lak.
“Aruak cu atutiang kan la kho rih lo,” tiah chungkhar nih an chim.
Khaikham khua um ngakchia 3 hna i an pa pakhat zong Kalaymyo sandahpiahnak ralkap le palek nih an kah thah ve.
