Myanmar hlasa minthang Song Oo Hlaing nih Ralkap uknak i lutlai an fale pawl cu ramdang ah an him ti lo ee tiah a hun chim.
Song Oo Hlaing: Hmasabik ah Australia khuasa Kawlrammi nih thanh dingin an ka fialmi in ka thok lai.
Min Aung Hlaing nih a chungkhat he i bawm in uknak an lakmi a si. Nawl ngeihnak an fir.
Zeiruang dah cutin kan chim khawh ti ahcun Min Aung Hlaing nupi Daw Kyu Kyu Hla le ralkap council chungtel Ramdang Vuanci deu Wanah Maung Lwin nupi hi cousin sister an si. Chungkhat an si hna.
Palek bawi Kyi Lin kong biapi in chim ka timhmi a si. Wanah Maung Lwin i a nupi tta a si.
Australia um Kawlrammi nih thawngpang an theihnak ah amay Aung San Suu Kyi an tlaih i inn ah an hrenmi hi palek bawi Kyi Lin nawlpeknak in a si an ti.
Palek bawi Kyi Lin i a fanu Julie cu atu hi Australia ram, Perth khua ah a um lio a si. A fanu cu atu hi harnak a tong cang lai.
Sianginn a kai kho ti lai lo, dan an tat lai. A chunmang, saduhthah tuah kho ti loin Myanmar ram ah a tlung cang lai.
A ruang cu Australia phan Kawlrammi pawl nih an ngaithiam lo.
Myanmar ramchung a cangmi thil ruangah ngaihthiam khawh ding silo. Keimah zong nih ka ti ve.
Tutan Min Aung Hlaing nih cozah uknak a lakmi cu aa palh tuk. Myanmar ram mipi kan lungfak tuk. Ramchung ngakchia an hmailei le nan fale an hmailei nan hrawh dih.
USA, New York in an ka thanh termi cu Ralkap bawizik chang fanu cu atu hi zaam le thuh in a um lio a si. Kawlrammi pawl nih an kawl lio pi a si.
A fanu cu ngakchia telawng a si rih. Mah ralkap bawizik changtu i a nupi cu kan ngakchia tein sianginn kai tti khat kan si.
Ka ngakchiat lio i ka hawikawm si i an fanu cu ka fanu bantuk si dingmi kha atu ahcun Kawlrammi pawl nih hitin an tuah cang ahcun keimah nih zeihmanh ka tuahpiak kho ti lo.
Kawlrammi pawl nih lam pakhat cu a um an ka ti. Hmasa ka chimmi palek bawi Kyi Lin, Vuanci deu Wanah Maung Lwin le ralkap bawizik chang kha rak i bawm hna ulaw Min Aung Hlaing cozah ah rak i tel hlah uh.
Nanmah zong uknak u hruh pi hlah uh. Uknak nan duhtuknak ah ramdang um nan fale zong harnak an tong dih cang. Thilttha a si lo.
Min Aung Hlaing kha rak thla ulaw, mipi duhmi uknak a si khawhnak hnga rak i zuam uh. Cutin nan tuah ahcun bia kan kamh hna, ramleng um nan fale fimcawnnak le himnak cu keimah nih tuanvo ka lak lai.
Australia, America, UK, EU ah Kawlrammi tampi an um. Ralkap chungkhat pawl an hlat dih hna. Cucaah, mipi lei ah ttang in mipi rak veng hna uh.
