Sagaing ramṭhen khuate pawl ah khuami le ralkap an i kah hnu ah ralkap tam taktak an thlah hna i April 20 thokin nihin tiang khuate mi thong tampi nunnak kawl in an zaam, tiah Irrawaddy media nih a thanh.
Yinmabin peng khuate pawl cu ralkap nih an luhhnawh thluahmah hna caah ther le phang in kan um, tiah khuami nih Irrawaddy sinah an chim.
April 20 ahkhan Kapaing, Thigone le Thityarpin khuate ah ralkap an luh caah khuami nih an kah hna i an i kap.
Khuami cu ram vaihnak puahceh meithal le chai an hmang. Ralkap nih cun meithal le RPG in an kah hna, tiah khuami nih an chim.
Khuami 10 leng an thah hna i tampi an tlaih hna. Ralkap nih Kapaing khua inn vialte an luhhnawh dih hnu ah mah khua cun umhmun an khuar.
Ningani ah khua in an chuak nain Zarhpini ah mawṭaw 21 bakin ralkap 200 hrawng an ra ṭhan. Ralkap sibawi pawl zong an i tel. Daihnak umter (mipi uk) kan duh an ti, tiah khuami nih an chim.
Kapaing, Thigone, Kabyu le Paungwa khuate 4 cu kan hnu zarh Nihnihni thokin khuami nih an chuahtak (zaamtak) dih i hohmanh an um ti lo.
Kapaing khuami pakhat nih, “Ralkap nih inn vialte lut in rawl, aar, vok, motorcycle le tangka an fir dih. Nu thil tiang an fir,” tiah a chim.
Khuami tam deuh cu ramtang ah an um. Adang cu khua in a hlatnak lo ah an um. Zawt sual cun zohkhenhnak zong kan ngei lo. Rawl le ti zong kan ngei lo, an ti.
Ramtang ah a chungkhar he ni 6 chung a um cangmi Kapaing khuami pakhat nih, “Ramdang nih a kan bawmh lomi hi kan thinhung tuk,” tiah a chim.
“Kanmah le kanmah kan i bochan a hau ko cang. Ralkap cu kan zaamtak peng hna lai, a kan kham ahcun kan doh hna lai,” tiah Irrawaddy sinah a chim.
Nikhatni ah, ralkap nih pawngkam um Lattkapyar khuate an luhhnawh i khua pawng ramtang ah khuami an kawl hna.
April 20 i kah lio ah a thimi ruak lak aa thawhmi Wingone khuami 50 hrawng cu ralkap nih an tlaih hna i tangka in an tlanhter hna.
“A zaam khomi khuami vialte tangka kan i khawl i kan tlanh hna,” tiah khuami pakhat nih a chim.
Zarhteni ah, ralkap nih Thapyay Aye khuate an luhhnawh. Khuami cu ramtangah an zaam dih cang. Inn vialte an baoh dih i tangka, ar, vok, tbk an firpiak dih hna.
Khua phungki inn zong ralkap nih an luhhnawh i laptop 15 hrawng an chuh hna pinah inn chung thil tampi an hrawh.
