Kachin state ah motorcycle aa citmi nuva cu ralhrang Myanmar ralkap nih an kah thah hna.
Kachin state, Puta-O peng, Hpatmar khuate ah saikal aa pherhmi nuva cu zahan zingka 8am hrawngah ralhrang Myanmar ralkap nih an dawi kah thah hna.
Nuva hna cu Hpatmar khuate ah dum tuah dingin an rat lio ah ral a thawh caah motorcycle in zaam an i tim. Mah lio cun Myanmar ralkap nih an hmuh hna i an dawi kah thah hna hi si.
“Mah lio cu ral a thawh caah khuami zong an i thuh lio si. Mah ruangah an ruak zong tu zingka lawngah an va lak khawh,” tiah khuami pakhat nih a chim.
Thah tongmi nuva hna cu kum 20 fai lawng an si i an umnak zong thla tlawmpal lawng si rih. An ruak cu tuni an vui hna lai.
Zahan zingka 7am hrawng khan Lungshiyang le Hpatmar khuate kar ah KIA le Myanmar ralkap an i kap.
Hpatmar khuate cu February 1 ah KIA nih Myanmar ralkap sakhan pawl an tuk laknak Lungshiyang le Tsumpiyang khuate karlak ah ummi si.
Atu hi Hpatmar khuate ah Myanmar ralkap an um lio asi. February thla ah kahdohnak a chuah thokin khuami cu ‘nan tlik zaam ahcun kan in kah hna lai’ tiin an tlerh peng hna – khuami an tlik dih i kanmah lawng kan tan cun KIA nih an kan thah dih lai ti an phang rua, khuami hi phaw caah an hman rua hna.
