Nizaan December 12 khua dei hlan ah tanglam in Malaysia a rami Kawlrammi 8 an tlaih hna.
Tanglam in a rami pawl cu zaanṭim 1:30am ah Thailand ramri in Malaysia an hung lut. Ramri um Kelantan state i Rantau Panjang khuate ah an lut.
Puaisa tapeh pawl nih motor pakhat in an phorh hna lio ah palik nih an hmuh dawi tlaih hna hi si.
Khua palik bawi nih, “Zaanṭim ah Rantau Pankang khua in Pasir Mas khua lei ah motor pakhat rang tukin a kalmi kan hmuh caah kan dawi,” tiah a chim.
“Motor cu lamkam ah an rak chiahta i a mongtu le hawi cu pawngkam ramtang ah an zaam i kan hmu kho ti hna lo.
“Motor cu kan check i pa 7 le nu 1 kan hmuh hna. Myanmar rammi lawngte an si.
“Thil sining kan hlat tikah phungninglo in Thailand ramri in a thlithup in a hung lutmi an si.
“Pa 7 cu kum 18 in 40 kar an si hna. Nu cu kum 21 asi.
“An dihlak in, a herh ningin hma lak dingin Lahwahkah Zung ah kan ap hna,” ati.
Kan hnu zarh chin November thla tanṭim zong ahkhan tanglam in Malaysia rami Kawlrammi 17 an tlaih hna. Mah hi hmet law rel khawh asi.
