Thantlang ah Kawl Ralkap nih Pu Ral Tu an kah thah

Thantlang khuasa Hriangkhan khuami Pu Ral Tu cu nizaan September 29 zaanlei 6:30pm ah Kawl Ralkap nih meithal in an kah i a nunnak liam.

Pu Ral Tu (Bawi Bik Thawng pa) cu nizaan kha Hakha in Thantlang a tlung. Thantlang khua Pu Aung Bo inn hmai a phak ah Kawl Ralkap nih meithal in an kah i motor chungaah a nunnak liam colh.

Pu Ral Tu he motor aa citmi Pu Zo Peng zong alu ah meithal kuan nih a khen ve. Anih hi 2020 thimnak ah USDP in Thantlang peng ah MP aa cuhmi asi. Motor mongtu le aa cit vemi Pu Lawm Bik le Pu Than Heng cu an him ko.

Pu Ral Tu cu Malaysia Chin Christian Fellowship (CCF) ah Senior Pastor a ṭuan liomi Rev. Dr. Van Tha Lian i a pa asi.

Ralhrang Kawl Ralkap nih Pu Ral Tu a thahmi kong he pehtlai in Chin National League for Democracy (CNLD) Thantlang nih atanglei bangin ngaihchiatnak a langhter ve.

Pu Ral Tu (Patron, Chin National League for Democracy – Thantlang Peng)

Pu Ral Tu @Bawi Bik Thawng pa (kum 80s) hi a nunchung miphun, ram le biaknak caah aa pe zungzal mi le kan ramkhel, kan biaknak le kan miphun nih kan bochan zungzal mi a si. 1990 thimnak lio in Chin miphun caah harnak tuar in a rak cawlcang i ralkap namnehnak, a innlo le a ngeihchiah chuh tiang a ton buin, miphun dirkamhnak ah hramfek tein nihin tiang a nunnak pek in miphun caah a dir zungzal tu a si.

Nihin ni ah kan pa, kan miphun nih kan bochan mi nih a kan liamtak cu kan celh hrimhrim lo. Kan lungfah kan celh lo. A nunchung ah a tial mi tuanbia le a dirpi mi a zumhnak cu a dawtmi a Miphun le a tu le a tefa cung ah a hmun zungzal lai.

Kan Pa (Bawi Bik Thawng Pa), NA LIAM SIAHERH HLAH. NA RIAN TLAMTLING TEIN NA TUAH DIH CANG. NA KAN ROHTAK MI LE NA SADUHTHAH CU NA DAWTMI NA FA, NA MIPHUN NIH TLAMTLIN DING AH KAN I ZUAM LAI.

A HMUN LOMI VAWLEI RAM Ah NA KHUALTLAWNNAK PATHIAN NIH THLUACHUAH HRAM SEH. NA TUHMI THLAICI FEEK IN HRUM ZUNGZAL HRAM SEH.

Lungfah ngaihchiat bu in,

CNLD (Thantlang Committee)