Min Aung Hlaing cu Myanmar ram ṭhat lei a panhter lo caah tu thla ASEAN meṭing kaiter lo dingin kan ceih lio asi, tiah palai pakhat nih tuni ah a chim.
Asia Nichuah Thlanglei ram 10 i funtomnak bu ASEAN nih April thla ahkhan ‘Myanmar ralkap cozah nih ram daihnak caah tuah ding bia 5 a chah’ nain Myanmar ralkap cozah nih a tuah lo caah ASEAN chungtel ram cheukhat palai pawl an ingpuang ngai.
Mah ruangah, ASEAN chungtel Malaysia le ramdang palai pawl cu Nikhatni ahkhan online meṭing an tuah i “tu thla ah tuah ding ASEAN meṭing ahcun Min Aung Hlaing kaiter ding asi ti lo” tiin biatung an dirh len.
Sinain mah ca kan ṭial lio tiang ahcun, kai ter lo dingin bia chah asi rih lo. Kaiter lo dingin an ceih lio lawng asi rih.
ASEAN nih bia an chahmi 5 lakah, “Myanmar ralkap cozah le dotu pawl karlak ah remnak ser dingin ASEAN special palai cu Myanmar ram ah tlawnnak nawl nan pek lai” timi zong aa tel. Nain Myanmar ralkap cozah nih tlawnnak nawl a pe lo.
“Min Aung Hlaing meṭing kaiter lo dingin biatak tein kan i ceih cuahmah hna,” tiah Brunei Ramdang Vuanci 2 Erywan Yusof nih a chim. Anih hi Myanmar tlawng dingin ASEAN special palai an thimmi asi.
“ASEAN nih bia 5 kan chahmi Myanmar ralkap cozah nih ka zulh ko lai a rak ti nain a zul taktak lo. Cucaah hmai nor loin hnulei a kir chin lengmang,” ati.
“Myanmar cu ASEAN chungtel sinak in dinhter chung dingin tu thla meṭing ah nan ceih lai maw?’ tiah an hal i “mah kong tu cu kan ceih rih lo” tiin a leh hna.
“Myanmar tlawng dingin timhcia ka si. Myanmar cozah nih tlawnnak nawl pek lawng ka hngak. Aa ka zultu ding zong tlawnnak nawl a pek hna a herh i dotu pawl zong tonnak nawl an ka pek a herh,” ati.
Kan hnu zarh Nilini ahkhan Myanmar ralkap cozah biachimtu nih, “ASEAN special palai nih taza kan cuai liomi pawl ton hna ding cu a har lai,” tiah Suu Kyi le a miṭhi pawl he tonter an duh lonak kong a chim.
Suu Kyi cu ralkap nih uknak an fir lio ah an tlaih i COVID-19 zulhphung na buar, a thlithup in ramdang in walkie-talkie na luhpi, mipi buainak tuah dingin na forh hna, tbk upadi tampi in taza an cuai.
Taza an cuainak upadi pawl hi kum 10 leng thongthlak khawhnak upadi an si hna.
Uknak firtu ralkap cozah nih cun 2023 August thla tiang ram kan uk lai i thimnak kan tuah lai tiin thawng a thanh nain a dikmi thimnak asi lai lo tiah mipi nih an duh lo.
