US Hluttaw Niam MP/representative pawl nih Myanmar ralkap cozah fak deuh in dantat dingin upadi hran an chuahpi. Democratic party he Republican party he an ṭangṭi. Fehter kho colh hna sehlaw ṭha tuk hnga.
‘Burma Ralkap a Tuahsernak Theipar Fak piin Zunternak Upadi 2021‘ timi upadi hran cu Democratic palai Gregory Meeks le Benjamin Cardin, le Republican palai Steve Chabot nih Hluttaw Niam (house) ah an chuahpi — Gregory Meeks cu New York state palai (MP/representative) asi i Hluttaw Niam i Ramdang Kawmiṭi Chairman zong asi. Bejamin Cardin cu Maryland palai le Steve Chabot cu Ohio palai an si.
“US le ramdang pawl nih ramkhel dantatnak kan tuah buin, Burma ralkap nih mipi tukvelh le thahnawn a ngol hlei lo i a tlaihmi pawl zong a thlah hlei hna lo caah atu bantukin dantatnak upadi kan chuahpi hi asi,” tiah Gregory Meeks nih a chim.
“Myanmar mipi nih democracy ngah an i zuammi hi, US cozah nih zatlang bu pawl le hartong mipi pawl bawmhnak pek in biatak tein bawm ve hna. Cun, Burma ralkap nih Rohingya miphun a thahnawnmi hna zong kha US Ramdang Vuanci Zung nih ‘miphun cihmih asi’ tiin fehter,” tiah a hal/nawl.
Myanmar ralkap cozah dantat dingin upadi hran an chuahpi mi cu nuhrin covo bu Global Witness nih a thangṭhat hna i ‘mah hihi a biapi tukmi si caah a rannak in fehter zokzok uh’ tiin a forhfial hna. Mah upadi hi an fehter ahcun, US nih democracy caah sandahpiahmi Myanmar mipi a dirkamh hna nak le tlaih le thah a tongmi hna caah thil dik chuahpi a duhnak kha a langhter lai pinah ralkap tangka luhnak zong a reh chinchin lai, ati.
Upadi hran an chuahpi mi ahcun, Myanmar ralkap tangka luhnak hrampi a simi lunghring le lung mansung pawl ramdang nih cawk hna lo dingin phih cikcek ding le ralkap cozah a bawmmi company vialte US cozah nih sipuaizi phih thluahmah hna ding timi zong aa tel.
Global Witness hruaitu Paul Donowitz nih, “Biden acozah nih Myanmar ralkap tangka hmuhnak nganbik a simi cozah gas company hi sipuaizi a phih cang awk asi. Kum 1 ah $1 billion leng an hmuhnak asi. Mah cu phihpiak dingin tutan upadi hran ahhin an chuahpi. Mah upadi hran hi a biapi taktakmi asi,” ati.
US le nitlaklei ram pawl nih Myanmar ralkap cozah lutlai le an chungkhar pawl cu sipuaizi tlawmpal an phih cang hna nain, ralkap cozah nih mipi thahnawn a ngol bal lo.
