Uknak firtu lainawng Myanmar ralkap nih Thantlang inn 22 an duah khangh ṭhan. A dihlak inn 1,000 hrawng an duah cang.
February 13 ah inn 22 an duahmi cu Sianginn Sang ah asi. Inn ngeitu hna min cu atang ah zoh khawh asi.
February 13 ah Thantlang ralhrang Myanmar ralkap lubik LIB 269 hruaitu Buhmuci Changtu Myo Zin Htun nih a hmenhmi bomb lila aa lamhsual i a ke bul lakin a puah hnu ah a tapeh pawl nih inn 22 an duah hi si.
Inn an duahmi cu February 13 zaanlei in 14 tiang an kaang.
Myo Zin Htun cu Major Nay Myo Oo nih a chan. Nay Myo Oo cu 2021 September 29 ah Pu Ral Tu le Pu Hram Cung a kap thattu kha si.
February 1 zong ahkhan inn 94 an duah.
Uknak firtu Myanmar ralkap nih September 9 in Thantlang inn khangh an thok i atutiang ah inn 950 leng an khangh cang. Mah chungah biakinn le biakinn zung 45 leng an i tel.
- Avoi 1nak September 9 ah inn 1
- Avoi 2nak September 18 ah inn 19
- Avoi 3nak October 29 = inn 164
- Avoi 4nak November 6 = inn 8
- Avoi 5nak November 9 = inn 2
- Avoi 6nak November 10 = inn 7
- Avoi 7nak November 11 = inn 3
- Avoi 8nak November 24 = inn 49
- Avoi 9nak November 27 = inn 96
- Avoi 10nak December 4 = inn 20
- Avoi 11nak December 5 = inn 38
- Avoi 12nak December 8 = inn 23
- Avoi 13nak December 18-20 = inn 65
- Avoi 14nak December 30 = inn 55
- Avoi 15nak December 31 = inn 4
- Avoi 16nak 2022 January 3-5 = inn 123
- Avoi 17nak January 6 = inn 13
- Avoi 18nak January 30 – February 1 = inn 94 le
- Avoi 19nak February 13 = inn 22 tiin a dihlak inn 950 leng an khangh cang.
Thantlang khua cu inn 2,000 hrawng a um i minung 10,000 hrawng nih an hlumhmi asi. Thantlang khua chung ah Myanmar ralkap nih duhpaoh in meithal le bomb an kah caah khuami 7 leng an thi i 20 leng hliam an tuar pinah inn tampi an duah caah khuami cu September thla chungah an zaam dih cang.
Atutiang ah inn 1,000 dengmang an khangh cang caah ‘Thantlang khua acheu ciam dihlak in an khangh cang’ tinak asi. Nain, an khanghmi pawl hi Thantlang khua a cawisangtu zalampi a tomi inn ṭha bik le dawr ṭhabik pawl an si hna caah ṭha tein ruah ahcun Thantlang khua cu an khangh dih cang ti khawh asi.
Zei tiang dah ral aa peh lai ti hngalh asi lo. Kum 5 leng zong a sau kho. Thantlang khuami thong tampi cu ral dih tikah kir hmanh hna sehlaw inn an ngeih ti lo pinah an ngeihchia chawva vialte zong khanghpiak dih an ton cang caah a thar in inn sak ding, pawcawmnak rian kawl ding le fale sianginn kainak, tbk ah an harsa tuk cang lai.
Cucaah ralzaam pawl hi ramthumnak an kal khawh ahcun an caah let tampi a ṭhat lai pinah hmailei ah ram le miphun caah phaisa tampi an thawh kho lai. Ramchung ramleng kan pale hna nih ram thumnak kal a duhmi ralzaam pawl hi kal kho dingin chimrel piak in lam serpiak hna sehlaw a ṭha tuk hnga.
