Nizaan October 29 ah ralhrang Kawl Ralkap nih Thantlang khua inn 164 an khangh, tiah tu zingka 9am ah Global Thantlang Relief Organization nih a thanh. A kaangmi hna cu;
- Zunghmun Sang = inn 58
- Market Sang = 52
- Biakinn Sang = 28
- TABC Sang = 22 le
- Lungtial Sang = 4 tiah a dihlak inn 164 an si.
Biakinn 2; Church on The Rock biakinn le Presbyterian Church biakinn le Thantlang Baptist Church (TBC) zung zong an khangh. Tangka ting thong tampi dih in sakmi ṭaih inn dot 4 asi — Biakinn le biakinn thilri hna khangh hi cu minung phung a si lo.
Nizaan 11am hrawngah bomb in inn an kah thluahmah hna i an kaang thluahmah. Nizaan chun tiang ahcun inn 11 hrawng lawng an kaang nain tu zingka 9am ahcun inn 164 an kaang cang.
Mei thattu an umlo caah inn khat hnu inn khat in mei a lawn thluahmah. Kawl Ralkap nih bomb in inn an kah lio hrim ahhin inn khat lawng kap loin, hmun kenkip ah inn tampi voi tampi an kah hna. An kahmi inn pawl cu an kaang i an pawngkam inn an tlaih chih cio.
Ral kan do ti zong asi lo, an khangh hramhrammi, Chin miphun an kan thlanglamh hramhrammi asi.
Nizaan zingka ahkhan Kawl Ralkap pakhat nih Thantlang ah inn a baoh i thil a fir lio ah CDF/CNA nih an kah thah i a meithal zong an lakpiak.
Mah ruangah Kawl Ralkap nih thinhun in hitin inn 164 bomb in an kah khangh hramhram hi asi.
Thantlang cu minung 10,000 hrawng an umnak khuapi asi. August le September thla ah Thantlang khua chungah kahdohnak a um i Kawl Ralkap nih khuami tampi an kah thah hna i inn zong an khangh caah khuami vialte cu an dihlak in an zaam dih cang. Cheukhat cu Mizoramri um Thantlang peng khuate pawl ah an zaam hna. Tam deuh cu Mizoram ah an zaam hna.
Atu khua chungah a taangmi cu minung 8 hrawng lawng an si cang.
September 18 zongah Kawl Ralkap nih Thantlang khua inn 19 leng bomb in an kah khangh hramhram cang. September 9 zongah inn 1 an khangh.
September le October thla chungah Kawl Ralkap nih Thantlang khua inn 180 leng an khangh cang.
Thantlang khua a khangtu Kawl Ralkap an bawipa hi Lt. Col. Thaung Hlaing asi.
Thantlang khuami Pi Hniar Te nih, “2002 ah Bawipa nih inn a kan pek. 2021 ah Bawipa nih a lak ṭhan. Kum 20 chung a kan hlanhmi cungah Bawipa sinah ka lawm. Kanmah kan him,” tiah inn khanghpiak a tonmi kong a chim.
Inn a kaangmi a ngeitu hna min cu atanglei hmanthlak ahhin zoh khawh asi.
Ralhrang nih Thantlang khua an khangh hlan hmanthlak a tanglei ah zoh khawh an si.
