Hmai zarh Nithumni (January 20) ah US President a ṭuan ding Pu Joe Biden nih, “US mipi pawl cu minung 1 ah $1,400 cio bawmh hna dingin Hluttaw/Congress ka hal lai,” tiah tuni ah a thanh.
COVID-19 kakuaisi tlamtling tein kan chunh dih hna hlan ah kan rammi an har tuknak hnga lo, cozah nih $1.9 trillion hmangin pumpak le company pawl bawm hna usih, tiin hal a timh hi si. Cutin hal a timhmi cu “American Khamhnak Simanking” tiin a auh.
Biden nih hal a timhmi cu:
- American pawl minung 1 ah $1,400 cio bawmh ding. December thla ah $600 cio bawmh dingin biakhiahmi he cun $2,000 cio asi lai.
- Rian ngei lo bawmhnak zarh 1 ah $400 bawmh chap in September thla tiang bawmh ding
- Rampumpi ah boss te nih rianṭuantu thahlawh a tlawmbik ah suimilam 1 ah $15 tal pek dih ding
- September thla dongh tiang cu inn hlan man le inn cawknak leiba pek/cham khawh lo ruangah hohmanh inn chuah le inn chuh/ting lo ding
- State le khua cozah bawmhnak caah $350 billion hman ding
- K-12 sianginn le sianghleirun pawl bawmhnak ah $170 billion hman ding
- COVID-19 hneksaknak caah $50 billion hman ding
- State, khua le miphun hruaitu pawl he i bawm in COVID-19 kakuaisi chunhnak caah $20 billion hman ding
- Ngakchia Tax Credit kha tu kum cu a ning tein khirh viar hna ding le ngakchia pakhat $3,000 ah credit kaihpiak hna ding (kum 6 tang ngakchia cu $3,600)
Acunglei langhtermi hi Biden nih president a ṭuan cangka in biapi bikin rianṭuan a timhmi pahnih lakah pakhat asi. Hi zatzat cozah tangka hman ding hi Hluttaw nih an fehter lai maw ti cu hngalh asi rih lo nain, Biden phu nih cun “an fehter lai ti kan zumh ko” a ti.
Adang pakhat cu February thla ah a thanhte lai i caan saupi chung ṭuan ding simanking asi lai. Rian tampi sernak, US ramchung lamsul le cozah innlo remhnak, khuati thlen dohnak le miphun tlukruan ternak pawl caah tangka cu zat hman ding ti asi te lai.
Cun, sianginn kainak leiba zong $10,000 cio ngaihthiam hna dingin Hluttaw hal a timh.
