𝗝𝗲𝘄𝘀 𝗠𝗶𝗽𝗵𝘂𝗻
𝗨𝗸𝗿𝗮𝗶𝗻𝗲 𝗣𝗿𝗲𝘀𝗶𝗱𝗲𝗻𝘁, 𝗨𝗸𝗿𝗮𝗶𝗻𝗲 𝗺𝗶𝗽𝗶 𝗹𝗲 𝗺𝗲𝗱𝗶𝗮 𝘄𝗮𝗿
Russia nih Ukraine a tuknak a nithumnak le a zaanlinak a hung phan.
Nithum chungah an khuapi Kyiv cu Russia nih a lak lai tiah an rak timi cu Ukraine defense force le a ral a ṭha tuk mi Ukraine mipi hrimtlai hna ruangah an la kho rih lo.
An ram president Volodymyr Zelenskyy nih himnak le zamnak cu duh loin, Ralkap uniform tu i hruk in an ram a ven. Ral hmun ah social media (media power) hmang in an mipi cu dirṭi ding in thazaang a pek peng rih hna.
Social media cu raltuknak (media war) ah hmang in Russia mipi sinah Ral hi a ṭhat lonak le ral nih zeihmanh ṭhathnemnak a ngeih lonak ding cu, president pakhat a sinak in si loin le Ukraine mipi pakhat aiawhnak tu in mipi sinah nawlnak a tuah hna.
Hi minung zawnruahnak in a khatmi speech (humanity concert speech) nih Russia khuapi 54 leng ah diknak ṭanhtu mipi relchawk lo lam cung tiang chuak in an president Putin’ i Ukraine invasion mission pi cu biatak te in an doh.
Atu hi ca ka ṭial tiang ah Russia mipi duh lonak langhtertu 1700 leng cu tlaih an si tiah CBC news ah report a tuah.
Ukraine ram hi mipi 43.6 million tluk hrawng an si i, Europe ah milu tamcem pa 8 nak an si. President Zelenskyy le Ukraine mipi 43.6 million nih cun social media hi raltuknak pakhat ah hmang in vawlei pi cu bawmh an hal cuahmah.
Atu zong an ram veng him ding in ramleng lei a phan cangmi hna an rak khrih than thluahmah hna.
Russia zong nih social media war hmang ve in, Ukraine a tuknak cu anmah Russia, NATO kut in an i ven ve nak a si i, mipi himnak zoh bu in ka tuk lai a ti peng ve.
Ukraine ram independent i a umnak kum 30 hnuah Russia kut in a him zawkzawk naklai NATO i lut pi cu President Volodymyr Zelenskyy i a chunmang a rak si nain, Russia nih NATO lut kho lo ding in le an ram lakpiak ding in a tuk cuahmah liopi cu a si.
Ukraine hi world war II lio hrim in miral ṭha ram an rak si pinah, Soviet union ah miphun ralṭha cem pakhat hrim an rak si.
Atu tiang ah Ukraine nih Russia ralkap 2800 tluk ah thah khawh cang hna, raltuknak mawtaw 516, Tank 80, van lawng 10 le helicopter 7 cu an hrawhpiak khawh cang hna.
Ukraine president Zelenskyy hi mino te a si i, zaangfak ngaingai khi a si ko. Amah hi Jews miphun a si pinah a pu hi Hitlar a rak dotu Jews Paral ṭha a rak si ve.
Vawlei ah Dictator pakhat a chuah paoh ah miphun lakah Heros ṭhaṭha an chuak ve tawn ti a si bantukin, atu Ukraine president Volodymyr Zelenskyy zong hi zohchun awktlak hero ṭha taktak pakhat a hung si.
President Zelenskyy nih nitlaklei ram hruaitu hna sin bawmh hal pah in, a hnu hnung bik nan ka hmuh a si men kho tiah a ti hna bantukin, president pa lu hi Russia nih a duh cem mi cu a si tak ko. Thi sual seh law, nitlaklei hruaitu hna an kut an i ṭawl ngam hna maw ti ruah awk a tam ko.
Jews miphun president pakhat a simi President Volodymyr Zelenskyy le Milu million pathum an umnak Kave khuapi (military control center) cu a tluk lo naklai thlacam bawm cio hna u sih law,
Ukraine mipi nih Ṭihnung Russia kut in himnak le teinak hmu hram ko hna seh law Dinnak nih kan ram, Ukraine le vawlei pi ah teinak hmu peng hram ko seh.
Caṭialtu: 𝗧𝗵𝗮𝘄𝗻𝗴 𝗧𝗵𝗮 𝗧𝗵𝗮𝗻𝗴 (Chin Person of the Year 2021)
27 Feb 2022 (4:00 am)
I need ammunition, not a ride
