Update: UN meeting ah U Kyaw Moe Tun a kai taktak cang. 76nk UN Bupi Meeting (UNGA) ni 1nk cu an lim cang. Myanmar ram aiawh in U Kyaw Moe Tun a kai. Uknak firtu Myanmar ralkap cozah an kaiter hna lo.
UN chungtel Cohlangtu Kawmiṭi (Credentials Committee) an dirh cang. Nain, mah kawmiṭi hi November thla lawngah meeting an tuahte lai. Mah tikah NUG maw kan cohlan lai asiloah Myanmar ralkap dah timi cu an khiahte lai.
Mah hlan chung paoh cu Aung Sang Suu Kyi acozah nih Myanmar UN Palai ah a rak thimmi U Kyaw Moe Tun hi Myanmar UN Palai asi peng rih ko lai.
Atanglei hi nizaan ah kan ṭialmi asi
Tuni September 14 in US ram, New York khuapi um UN headquarters ah 76nk UN Bupi Meeting (UNGA) an thok lai (mah ca kan ṭial cu New York ah 8am lawng si rih i an thok rih lo). September 30 tiang asi lai.
Hmai zarh Nihnihni in UN high-level debate an thok lai.
76nk UN Bupi Meeting ahcun uknak firtu Myanmar ralkap cozah kai kho loin kham dingin US le China lungtlinnak an ngei cang, tiah US ramkhel media Foreign Policy nih nizaan ah a thanh.
Myanmar ralkap caah cun ṭahchuak bak asi ko lai. February 1 ah uknak an fir hnu in ramdang nih ‘Myanmar cozah’ tiin kan cohlang hna seh ti hi thi dengin Min Aung Hlaing le ruahnak petu miphun rawitu Dr. Ngun Cung Lian te pawl nih an i zuam lenmi asi.
Myanmar Ralkap Cozah nih, “76nk UN Bupi Meeting tikah Myanmar ram aiawh biachimtu ding cu kanmah thimmi Wunna Maung Lwin asi lai,” tiin UN sinah thawng a thanh. Phun dangin chim ahcun, kanmah hi Myanmar cozah kan si caah kanmah minung hi Myanmar ram aiawh in UN meeting kaiter uh (kanmah hi Myanmar cozah ah kan cohlan uh) tiin UN an hal. Nain, atu ning te cun Myanmar mipi rawitu Wunna Maung Lwin le a miṭhi pawl cu UN meeting an kai kho lai lo tinak asi. UN nih Myanmar ralkap cu Myanmar cozah ah a cohlang lo tinak asi.
September 27 ah Myanmar ram aiawh in UN Bupi Meeting ah biachimtu cu Suu Kyi nih Myanmar UN Palai ah a rak thimmi, NUG ṭanhtu U Kyaw Moe Tun asi te ko men lai, nain ni kum UN meeting lio bantukin Myanmar Ralkap ṭhat lonak chim kha i sum deuh seh, tiin China le US an lungtling i zei dek lawhte lai.
Meeting an thokka ah UN member Cohlangtu Kawmiṭi (Credentials Committee) an dirh lai. Cohlangtu Kawmiṭi nih cun Myanmar telh in UN member dihlak ram 193 an dirhmun zohfelhnak le pehzulh in UN member ah cohlan awk an ṭhat/lo an ceih lai. Nain, mah kawmiṭi cu November thla lawngah meeting an tuahte lai.
Cucaah, November thla tiang cu UN nih Myanmar cozah caah NUG maw kan cohlan lai asiloah Myanmar ralkap dah timi bia a khiak rih lai lo tinak asi.
UNGA phungphai kan zoh tikah, Cohlangtu Kawmiṭi nih bia a khiah hlan paoh cu atu lio UN Palai kha asi peng rih lai ti asi caah November thla tiang cu NUG lei ṭangmi Kyaw Moe Tun hi Myanmar UN Palai asi rih ko lai tinak asi.
UN member Cohlangtu Kawmiṭi chungtel ram 9 hna cu:
- Sweden,
- Bhutan,
- Bahamas,
- Chile,
- China,
- Russia,
- Sierra Leone,
- South Africa le
- United States an si te men lai. Sweden nih a hruaite men hna lai.
