US President Biden acozah nih, US um Myanmar rammi paoh cu thla 18 chung um le rianṭuannak nawl a pek hna.
US Lahwahkah (DHS) Vuanci Pu Alejandro Mayorkas nih, “Myanmar rammi cu Caankarlak Runvenmi Dirhmun (Temporary Protected Status – TPS) ah kan chiah hna,” tiah a thanh.
Cucaah, US um Myanmar rammi paoh cu thla 18 chung US ah umnak nawl le rianṭuannak nawl an ngei cang.
DHS Vuanci nih, “Myanmar ralkap nih uknak an fir i mipi an thahnawn hna caah an ram chung hmun tampi ah mipi harnak an tong i an him lo, cucaah atu bantukin Caankarlak Runvenmi Dirhmun (TPS) ah kan chiah hna nak hi si,” ati.
March 11, 2021 tiang US ram ah phungning tein a ummi Myanmar rammi paoh cu tu hnu thla 18 chung US ah umnak nawl le rianṭuannak nawl pek dih an si.
“Na visa a thi cang, cu e kha e” tiin tlaih le Kawlram kuat nan tong lai lo.
Cawh sual lo ding – Mah thawngpang hi ‘refugee’ in US a phanmi Chinmi le tlangmi he zeihmanh aa sai lo. Nannih cu thih tiang um le rianṭuannak nawl a ngei cangmi nan si. Kum 5 hnu ah US Citizen soknak nawl hmanh a ngeimi nan si (nannih cu ‘Myanmar rammi’ ti nan si ti lo). Hi cu Myanmar passport in US a tlawngmi, rianṭuanmi le sianginn kaimi he lawng aa sai.
Caankarlak Runvenmi Dirhmun (TPS) cu zei dah asi?
Ram 1 ah buainak silole kokek ral fak tuk a um tikah US cozah nih US um kha rammi pawl kha ‘an ram an kir cun an him lo sual lai’ tiin an ram thil sining a ṭhat hlan chung US ah um le rianṭuanak nawl a pekmi hna asi.
El Salvador, Haiti, Nepal, Honduras, tbk. pawl zong US nih TPS a pek hna.
Cun, ramkhel buainak in a khatmi Venezuela rammi pawl zong TPS a pek ve hna caah US um Venezuela rammi ting 3 (300,000) hrawng cu US ah caankarlak um le rianṭuannak nawl an ngei ve.
US ah Myanmar passport in Myanmar rammi zeizat dah an um ti cu DHS nih a langhter lo caah kan hngal lo.
TPS cu US ah thih tiang umnak nawl asi lo. Myanmar rammi cu acunglei kan langhter bantukin thla 18 chung lawng asi.
Nain, thil sining hoih in US cozah nih a sauhte khawhmi asi. El Salvador, Haiti, Honduras, tbk. pawl zong a sauhpiak lengmang hna. A sauh lo ahcun a caan a dih tikah Myanmar ram a kir lomi cu DHS nih tlaih le khirh nan si te lai.
A hngal rih lomi um aikun – ramdang ahcun Lahwahkah cu Ramchung Vuanci Zung tangah a um. Ramchung Vuanci Zung nih lahwahkah/mi lutchuak, palek, ramchung himnak, tbk. vialte ṭuanvo a lak dih.
Sinain, US ram ahcun Lahwahkah cu amah dang tein vuanci zung pakhat asi ve i Ramchung Vuanci Zung cu amah dang tein a um ve, an ṭhen hna. Lahwahkah Vuanci Zung (DHS) nih US mi lutchuak, palek, ramchung himnak, ralhrang, computer le internet himnak, tbk. vialte a tlaih dih. Ramchung Vuanci Zung (DOI) nih cun kokek panchian, nunphung hmunhma, tbk. pawl a zohkhenh hna.
