US cozah nih uknak firtu Min Aung Hlaing fale 2 le an tlaihmi company 6 a phihkham (dantat) hna.
US Tangka Vuanci Zung (Treasury Department) nih, “Khin Thiri Thet Mon le Aung Pyae Sone (hmanthlak) dan kan tat hna,” tiah thawng a thanh.
Anmah 2 hi, Myanmar mipi uknak a kan chut i ram hruaitu rian aa lakmi Min Aung Hlaing fale an si.
US cozah nih dan a tat (phihkham) hna caah, Min Aung Hlaing fale 2 le anmah tlaihmi company 6 nih US ram ah an ngeihmi chawva vialte hman khawh lo dingin kharpiak dih an si cang. US rammi hohmanh nih pehtlaih le sipuaisi tuahpi zong a ngah lo. – US rammi Dr. Ngun Cung Lian nih ‘ralkap a bawmh hna’ caah US upadi a buar.
US Ramdang Vuanci Pu Antony Blinken nih, “Myanmar ralkap cozah nih hriamnam ngei lo sandahpiahtu pawl a tukvelh hna i minung 1,800 a tlaihmi hna le minung 64 leng a thahmi hi kan cohlang kho lo. Tu hnu zongah dantatnak a ra rih lai,” tiah a chim.
“Mipi duhnak hrawh dingin buainak a chuahtertu pawl cu tu hnu zongah dan kan tat rih hna lai,” ati.
Min Aung Hlaing cu kum 2011 thokin Myanmar ralkap bawizik a ṭuanmi si. Myanmar ram ahcun ralkap cu mipi nih tazacuai le thongthlak khawh an si lo caah Min Aung Hlaing le a chungkhar nih an duhmi paoh an tuah khawh. Ram thilri le nawlngeihnak zong anmah miaknak caah duhpaoh in an hman, tiah Justice for Myanmar nih a chim.
US cozah nih dan a tatmi Min Aung Hlaing fale company 6 lakah A&M Mahar zong aa tel. Min Aung Hlaing fapa Aung Paye Sone tlaihmi company asi.
Apa nawlngeihnak ningcang loin (amah miaknak caah) a hman i ramdang sii company pawl kha Myanmar FDA zungah fawi ta hlak in license a lakpiak peng hna tu company asi. Ramdang sii company nih tangka ceilak an pek peng.
US dantatnak hi a neem tuk
“US Tangka Vuanci Zung nih dengteo bakin Min Aung Hlaing chawva a den cu thangṭhat awktlak asi ko nain, mah nak fak deuh in dantat rih an hau,” tiah Nuhrin Covo Zohtu (Human Rights Watch) ah Asia director a simi John Sifton nih a chim.
“Mah dantatnak ruangah Min Aung Hlaing nih a lungṭhul lai lo.
“Ralkap tangka luhnak vialte hi phit viar hna sehlaw ralkap caah a fak taktak lai. Mah hi phihpiak (dantat) hna seh ti kan duh,” ati. Ramdang company pawl he i bawm in Myanmar ralkap company nih zinaan, gas, tbk. an chuah/zuarmi phihpiak khi a chim duhmi si.
Myanmar ralkap company tumtlang taktak a simi 2; Myanmar Economic Corporation (MEC) le Myanmar Economic Holdings Limited (MEHL) balte cu US cozah nih fak piin a phihkham (dantat) rih hna lo.
