Myanmar ram aiawh in US ah Miss Universe aa zuammi Thuzar Wint Lwin nih Laithil bakin Ram Thilthuam Ṭha Bik (Best National Costume) laksawng a ngah.
Ngaknu dawh Thuzar nih, “Ram Thilthuam Ṭha Bik laksawng ka ngahmi kong he pehtlai in, Chin miphun nih tampi nan ka bawmh caah ka lawm tuk hringhran,” tiah Chin miphun cungah lunglawmhnak bia a chim.
“Nan dihlak nan ka bawmhnak thawngin mah dirhmun hi ka phakmi asi. Ka lawm tuk hringhran,” ati.
Thuzar cu Myanmar ram aiawh in ramdang ah Miss Universe aa zuam ding thimnak ‘Miss Universe Myanmar’ an tuah lio ah Hakha khua aiawh in aa rak zuam i pakhatnak a ngahmi si.
Thuzar cu ‘Ram Thilthuam Ṭha Bik’ laksawng a ngah pinah Top 21 zongah aa tel.
“Hi nakin a sang deuhmi laksawng ngah cu ka duh ko nain Top 21 ah kaa tel khawh vemi hi nan dihlak nan i lungsak cio ko lai tiah ka zumh.
“A caan bau lo tein tha aa ka pe zungzalmi ramchung ramleng mipi le Miss Universe zuamnak kal kho dingin a lamkip in aa ka bawmtu theihhngalh, hawikom, zuam ning tinṭan aa ka petu Ko Aung Paing le Ram Thilthuam hruk awk khulrang tein aa ka timh piaktu US ram Atlanta khuapi um Chin Taung Tan nan cungah kaa lawm tuk,” ati.
Thuzar cu zuamnak ah “Myanmar thla kan caampiak uh (Pray for Myanmar)” timi catar aa put pinah ralkap nih mipi an thahmi hna kong zong a chim caah atu hi Kawlram kir ding a caah ṭihnung ngai.
Tuni ah limmi Miss Universe 2020 cu Mexico ram aiawh in aa zuammi ngaknu Andrea Meza, kum 26 nih a ngah.
