Yaw Defense Force (YDF) chungtel Lai nu Tu Tu nih, “YDF hi kan ṭhawn lo ahcun Chin ram ah ralhrang fawi tukin an lut kho lai. Atu hi YDF cu phaisa tampi bawmtu kan ngeih lo caah kan harsa tuk. Kan ralkap pawl cu rawl ei awk rep zong an ngei lo. An kan bawmhmi hnih khat tete cu hriamnam man a fah tuk caah a dih dih. Kanmah te zongin hriamnam kan i ser, kan thiam ve lo caah kan hneksaknak ah a nunnak liammi zong an um,” tiah a chim.
“YDF hi ralkap phu (battalion) 14 kan si. Ralkap a ṭuan cuahmahmi (active) hi 3,000 hrawng kan si. Kenret ralkap (reserve) hi 2,000 hrawng an um rih.
“YDF hi dothlennak tuahtu phu tampi he ṭangṭi dingin lungtlinnak (ally = မဟာမိတ်) kan ngei. Kanmah YDF lawng cun cawlcangh khawh asi lo. Hriamnam cawk kan duh zongah India lei in luhpi kan duh ahcun kan ṭanṭi CDF le CNF le PDF Kalay he kan i pehtlaih.
“Kannih hmunhma hi kahdohnak a tam ngai. Atu le tu kahdohnak a um peng. Bawmchantu ṭha kan ngeih lo tikah hriamnam lei ah si seh, rawl ei awk kongah si seh, mipi kan in bochan ko hna. Kaa lawm tuk,” ati.
![](https://thechinexpress.com/wp-content/uploads/2021/12/Tu-Tu-YDF.jpg)
Yaw hi Laimi cheukhat nih kan thei tuk lo kho men. Magway ramṭhen, Gangaw district i Gangaw peng, Saw peng, Kyaw peng, Khaukhtuh peng le Htilin peng vialte khi asi. Chin state Mindat le Kanpetlet he aa rimi asi i Chinmi tampi an umnak asi.
Phun dangin chim ahcun, Yaw (Gangaw district) hi ralhrang Myanmar ralkap pawl nih Chin state (Mindat, Kanpetlet le Matupi) an luhnak kutka asi – cucaah YDF hi Chin ram kutka congtu bantuk an si.
Ram thumnak um Vaurawng Zuunthil phu nih YDF (Yaw PDF) caah tuni ah Facebook live thlah in phaisa an kawlpiak hna.
Zarhteni zaan (US Caan, Asia cun Zarhpini chun) zongah YDF caah phaisa an kawlpiak ṭhan hna lai.