Vaurawng Zuunthil phu nih CDF-Thantlang caah $80,000 (Kawlram ting thong khat le ting zali le ting kul) a kuat.
Vaurawng Zuunthil phu cu US ram ah ummi Dr. Bawi Uk Thang le a hawile an si.
Kawlram dothlennak caah Facebook ah live thlah in phaisa an kawlpiak hna i cutin an hmuhmi tangka an kuat hi si.
Chin ram lawng si loin Kawlram pumpi Chin dothlennak vialte caah an caan le thiamnak hmang in phaisa an kawlpiak peng hna.
Atu mah ca kan ṭial lio zong hi awṭha Biak Hlei Par sawm in Magway ramṭhen um Yaw PDF (Yaw Defense Force – YDF) caah live thlah in phaisa an kawlpiak cuahmah hna lio asi.
Yaw hi Laimi cheukhat nih kan thei tuk lo kho men. Magway ramṭhen, Gangaw district i Gangaw peng, Saw peng, Kyaw peng, Khaukhtuh peng le Htilin peng vialte khi asi. Chin state Mindat le Kanpetlet he aa rimi asi i Chinmi tampi an umnak asi.
Phun dangin chim ahcun, Yaw (Gangaw district) hi ralhrang Myanmar ralkap pawl nih Chin state (Mindat, Kanpetlet le Matupi) an luhnak kutka asi – cucaah Yaw PDF hi Chin ram kutka congtu bantuk an si.

Yaw PDF (YDF) chungtel Lai nu Tu Tu nih, “YDF hi an ṭhawn lo ahcun Chin ram ah ralhrang fawi tukin an lut kho lai. Atu hi Yaw PDF cu phaisa tampi bawmtu an ngeih lo caah an harsa tuk. Rawl ei awk rep zong an ngei lo. An kan bawmhmi hnih khat tete cu hriamnam man a fah tuk caah a dih dih. Kanmah te zongin hriamnam kan i ser, an thiam ve lo caah an hneksaknak ah a nunnak liammi zong an um,” tiah a chim.
“YDF hi ralkap phu (battalion) 14 kan si. Ralkap a ṭuan cuahmahmi (active duty) hi 3,000 hrawng kan si. Kenret ralkap (reserve) hi 2,000 hrawng an um rih.
“YDF hi dothlennak tuahtu phu tampi he ṭangṭi dingin lungtlinnak (ally = မဟာမိတ်) kan ngei. Kanmah YDF lawng cun cawlcangh khawh asi lo. Hriamnam cawk kan duh zongah India lei in luhpi kan duh ahcun kan ṭanṭi CDF le CNF le PDF Kalay he kan i pehtlaih,” ati.

Nizaan tihni zongah CDF-Mindat caah $61,000 leng an pek.
CDF-KKG (Kalay, Kabaw le Gangaw) zong $101,000 leng an pek cang.

Dr. Bawi Uk Thang nih, “Atutiang ahhin Kawlram, ahlei in Chin ramkulh dothlennak caah Vaurawng Zuunthil nih phaisa kan kawlpiak hna i $2 million dengmang kan hmuhpiak cang hna,” tiah a chim.