Magwe ramṭhen i khuate NLD chairman le a tupa cu nizaan Ningani ah ralkap party USDP member pawl nih an thah hna, tiah khuami nih an chim.
Ralkap cozah council chungtel pawl nih Pwint Phyu peng khuate pawl an tlawn hna lio ah khuami nih ralkap duhlonak an langhter caah atu bantukin USDP member pawl nih khua NLD chairman le a tupa an thah hna hi si.
Khaung Gone khua i NLD member pakhat nih, “ralkap council chungtel pawl an rat lio ahhin USDP member pawl nih an don hna. Mah ruangah khuami he tlawmpal an buai,” tiah Irrawaddy tadinca ah a chim.
An i velh lio cun, rak tlai hna uh tiin USDP member pawl nih palek le ralkap an chawnh hna. Palek le ralkap nih mibu ṭhennak caah meithal zun 3 an puahmi zong khuami nih LIVE an thlahmi ah hmuh khawh asi.
“Nain, mah zaan ahcun khuami nih khat le khat ralrin i peknak caah umkheng an tum i minung pakhat hmanh an tlai kho hna lo.
“A thaizing 9:30am ah, USDP members 24 hrawng nih an hawikom inn in a ṭinmi khuami pawl an velh hna. Mah lio cun, khua NLD chairman U Htway Naing, kum 53 le a tu pa Ko Nan Wai Aung, kum 17 cu vainam le namtong in an tuk hna i an thah hna. Adang minung 2 zong fak tukin an hliam hna.
“An thah hna pinah, an ruak cu an hnuh i inn pakhat ah an kalpi. An ruak zong kan la kho lo,” tiah a chim.
Hnu ah, palek le ralkap nih USDP member pawl cu tlaih loin ruak lawng an lak i ruak cu kalpi an timh caah khuami nih palek mawṭaw an kham.
“Ralkap nih palek nih ‘kan rianṭuannak ah i thlak hlah uh, kal dih uh’ tiin khuami cu an hro hna. Khuami nih ‘lainawngtu pawl tlai hna uh’ an ti peng hna caah lainawngtu 11 cu an tlaih ṭhan hna.
“Lainawngtu lakah Pyithu Hluttaw MP aa rak cuhmi USDP member U Kyaw Khine Oo zong aa tel.
“Amah le lainawngtu dang pawl cu palek nih an tlai hna lo. Chungkhar nih palek sakhan ah report an timh hna lio asi,” tiah khuami nih an chim.
