Myanmar ralkap bawi pawl cu ‘mipi thimmi cozah uknak nan chuh’ tiin Canada le United Kingdom nih phihkhamnak an tuah hna.
US zong nih kan hnu zarh ah phihkhamnak a tuah cang hna. Japan zong nih “US nih Myanmar ralkap bawi pawl a phihkhammi hna hi ka lungtling” ati.
India le Australia nih, “a rannak in mipi thimmi cozah sinah uknak pek ṭhan a herh,” an ti ve.
UK nih, “Myanmar ralkap bawi 3 cu kan ram tlawn ka phih hna lai i kan ram um an chawva ka kharpiak dih hna lai,” ati.
Canada nih cun ralkap bawi 8 ka phihkham hna lai, ati.
“Myanmar ralkap bawi pawl nih nuhrin covo an buar. Myanmar mipi nih thil dik an co khawhnak hnga ka ṭanṭi ram pawl he i bawm in an tuhmi theipar kan zunter hna lai,” tiah UK Ramdang Vuanci Dominic Raab nih a chim.
Ralkap bawizik Min Aung Hlaing cu Rohingya thahnawn ruangah UK nih phihkhamnak a tuah cangmi si.
Phihkhamnak thar an tuahmi kong cu Myanmar ralkap nih zeihmanh a chim rih lo. Nain, Nihihni ahkhan ralkap biachimtu nih, “ramdang nih phihkhamnak a kan tuah lai ti cu kan i ruah ciami si ko,” ati. – an zei poi lai lo tinak si.
US Ramdang Vuanci Mr. Antony Blinken nih, “a rannak in Myanmar mipi nih an thimmi cozah sinah uknak pek ṭhan a herhnak kong cu Japan, Australia le India ramdang vuanci he kan i ceih cuahmah,” tiah nizaan ah a chim.
Sinain, Myanmar ralkap cu China le Russia he aa pehtlai deuhmi si caah acunglei langhtermi ram pawl nih cun zei pipa harnak an pe kho lai lo.
Tuanbia zoh tikah, ramdang nih Myanmar ralkap phihkhamnak an tuahmi hi zei pipa san a tlai lo.
