Russia nih Ukraine ram a tuk caah Ukraine rammi tampi an zaam thluahmah hna. Ukraine mipi tam ngai zong an thi cang.
China cozah nih, “Ukraine ram um China rammi pawl harnak nan tonnak hnga lo inn chungah i erh uh, hmun dangah motor i mongh nan hauh ahcun nan motor ah China thantar thlai uh,” tiin thawngthanh.
China le Russia cu aa bawm pengmi an si. China thantar an hmuh ahcun Russia ralkap nih an kap hna lai lo. Ukraine ralkap zong nih China rammi cu an kap ngam hna lai lo.
Ukraine kong he pehtlai in China Ramdang Vuanci nih, “Ukraine ram buainak hi felfai tein kan zoh peng ko. Kap hnih ningin i sum veve uh,” tiah media sinah thawngthanh.
“China nih cun ahohmanh sipuaizi kan phit hna lai lo. Russia le Ukraine he pehtlai in sipuaizi kan tuah peng ko lai,” ati.
Russia nih Ukraine a tuk hlan hrim ah, China nih ramkhel le sipuaizi lei in Russia a bawmhte lai ti cu ho paoh nih ruahcia asi ko, nain ralkap in cun a bawm lai lo tiah zumh asi – ralkap in a bawmh ahcun US le Europe nih ralkap in Ukraine an bawmh ve lai i vawlei ralpi 3nk a tho kho.
Russia nih Ukraine a tukmi hi US, Europe le ramdang pawl nih cun ‘Ukraine ram chuh dingin a tuk’ an ti nain China cozah nih cun ati duh lo.
China nih cun, “Nanmah nitlaklei ram pawl le China kan i lawh lonak cu mah hi asi men lai. China cu biafiang um hlan ah biachahnak kan tuah lo,” tiah ram chuh dingin a tuk ati duh lonak kong cu a fianter.
“Ram chuh dingin a tukmi asi/lo cu atu lio Ukraine ram sining hi kan zoh awk asi tiin kan ruah. Ukraine ram tuanbia zoh tikah hlan liopi in atutiang a hnoksak tukmi asi. Hopaoh nih an ruah ning bantuk asi lo kho men,” tiah a chimchap.
Tu zingka ah China khualipi Beijing ah China Ramdang Vuanci Zung nih media sin thawngthanhnak a tuah i hitin a chim hi si.
