Minung 700 leng nunnak a la cangmi Myanmar buainak hi ‘Syria bantuk buainak fak taktak ah aa chuah kho’ tiah UN Human Rights zung nih a chim.
Ralkap nih February 1 ah mipi thimmi cozah uknak a chuh thokin, Myanmar ram cu buainak lawngte in a khat, sipuaizi zong voi dang bantukin tuah khawh asi ti lo.
UN Nuhrin Covo Zung lutlai Pi Michelle Bachelet nih, “Myanmar ralkap nih a rammi a hremmi hna le thahmi hna hi ngolter dingin ramdang nih a rannak in hma an lak hau,” tiah a chim.
“Myanmar boruak hi buainak fak taktak lei ah a panh thluahmah cang caah ka thinphang.
“Kum 2011 ah Syria buainak aa thok lio bantuk alo cang,” ati.
Syria buainak in atutiang ah Syria rammi ting 4 (400,000) hrawng an thi cang. Ting 60 (6 million) leng nih an ram an zaamtak cang. Myanmar buainak zong hiti ningin zoh sawh peng ahcun mah bantuk dirhmun a phan kho, ati.
Atutiang ah Myanmar ralkap nih rammi 710 leng a thah cang hna.
Ralkap nih Karen state khuate tampi ah vanlawng in bomb a thlak caah mipi 24,000 leng nih an khua an zaamtak cang. Minung 20 leng an thi i 40 leng hliam an tong.
Karen mipi cu, ralkap nih a kan kah lai ti an phan caah lo rian zong an ṭuan ngam ti lo, hiti ning cun hmai kum rawl ei awk an ngei te lai lo, tiah a hmun ummi Free Burma Rangers nih a chim.
Ralhrang Myanmar ralkap nih internet a phih dih caah mipi nih fawi tein thawngpang an thei kho ti lo, cucaah ralkap uknak a duh lomi mino pawl nih a thlithup in tadinca an chuah. Tadinca min cu “Molotov” tiin an auh. A chuahtu pawl cu ralkap nih tlaih le thah dingin a kawl cuahmah hna lio asi.
Ralkap tadinca Global New Light of Myanmar nih, “Molotov tadinca cu kanmah nawlpeknak tel loin an chuahmi si caah an tuhmi theipar kan zunter hna lai,” tiah a thanh.
Minta, mintami, hlasa, tbk minthang tlaih dingin ralkap nih nawl a chuahmi cazin ah minthang 20 a telh chap hna i minung 200 an si cang. An tlaih khawh hna ahcun an hrem hna lai pinah kum 3 leng thong an thlak khawh hna.
