US President Joseph Biden le Indonesia President Joko Widodo nih, “Ramkhel ruangah na tlaihmi vialte thlah dih hna…,” tiin Myanmar ralkap bawizik Min Aung Hlaing an hro.
Atu lio hi Scotland ram, Glasgow khuapi ah EU telh in vawlei cung ram ṭhawngṭha 20 (G20) hruaitu pawl cu Khuati Thlennak Meṭing an tuah lio asi.
Mahka cun manh caan ah Indonesia President le US President tonbiaruahnak an ngei i ‘ramkhel thongtla vialte thlah dingin’ uknak firtu Myanmar ralkap cozah an auhnawh hi asi.
US President Zung (White House) nih, “President Biden le President Widodo an i ton lio ahcun, Burma ram ah ralkap nih mipi cozah uknak an chuhmi an lungṭhat lonak kong zong an i ceih,” tiah thawngthanh.
“Cun, Myanmar ralkap nih buainak le raltuk a ngol hrimhrim le ramkhel ruangah a tlaihmi vialte a thlah dih hna le a rannak in mipi sinah uknak a pek ṭhan a herh tiah an lungtling veve,” ati.
“ASEAN nih kan hnu thla meṭing ah Myanmar uknak firtu lutlai Min Aung Hlaing nan pheomi kha ka lungtling tuk. Nan thil tuahmi hi US nih kan in dirkamh hna tiin Biden nih Indonesia President a chimh,” ati.
An i ton lio ahcun Myanmar kong lawng asi loin ‘Indo-Pacific’ tiin auhmi China le innpa ram pawl ramri rili vialte China nih amah ta ah i lak dih aa zuam cuahmahmi doh in innpa ram le ramdang vialte nih i hrawm ciomi rili siternak kong (China kut in Indo-Pacific rili luatternak kong) zong an ceih.
Indonesia cu hmai thla December 1 in 2022 kum dongh lai tiang G20 president asi lai.
Myanmar ralkap nih uknak a fir ka ahcun Myanmar mipi nih US le UN an rak i bochan tuk hna nain nihin thla 10 tiangah zei taktak hmanh an tuah khawhmi a um lo. A zoh dawhnak in cathanh an chuah ve tawn i sipuaizi tlawmpal cu an phih ve nain nihin tiang Kawl Ralkap a lung an ṭhulhter kho rih lo. Sa a seh kho lomi cakei bantuk an si, silole velhle thiam aanka nem nungak bantukin mi deuhtu an si. Kan ram thlennak dingah US le UN an biapi ve ko nain let tam tuk in Myanmar mipi kan biapi deuh.
