US le NATO nih Ukraine sinah ral tuknak vanlawng kuat dingin khua an khan liopi asi.
US Ramdang Vuanci Pu Blinken nih, “Ukraine ralkap sinah ral tuknak vanlawng kuat dingin atu hi Poland cozah he kan i ceih liopi asi,” tiah a chim.
Poland cozah nihhin Russia sermi ral tuknak vanlawng MIG-29 tampi a ngeih. Mah bantuk vanlawng hi Ukraine ralkap nih an ngeih vemi le an hman thiammi asi.
Ukraine ralkap nih cun US sermi ral tuknak vanlawng an ngeih bal lo caah an mong/hmang thiam lo. Mah ruangah US vanlawng kuat awk an ṭha lo.
US nih Poland cu, “Na vanlawng MIG-29 pawl hi Ukraine sinah kua law na kuat zat in US vanlawng F-16 kan in pek lai…,” tiin a fial.
Nain atutiang ahcun Poland nih a duh rih lo i zei dek a lawhte lai. Poland lawng si loin NATO chungtel ram pawl zong nih Ukraine sinah ral tuknak vanlawng an kuat khawh ko, tiin US nih a chim.
US Ramdang Vuanci nih, “NATO chungtel ram 30 chungah a duhmi paoh nih an vanlawng cu Ukraine sinah kua ko hna seh, an kuat ding hi US nih kan duhmi asi ko,” tiin a chim.
No-fly zone an tuah duh lo
Ukraine President nih, “Ukraine cungah vanlawng zuan khap (no-fly zone tuah) uh,” tiin US le NATO a fial hna nain an duh lo.
US le NATO nih, “Ukraine cungah vanlawng zuan khap (no-fly zone tuah) khawhnak lam pakhat lawng a um — Ukraine cungah a zuangmi vanlawng vialte kah thlak dih an hau. Russia ralkap vanlawng kah thlak a hauh lai caah Russia le NATO ram vialte ral kan tho lai i vawleipi khuaci kan mui chinchin lai. Ral hi Ukraine pin karhter awk a ṭha lo,” an ti.
US le NATO nih Ukraine cu hriamnam tampi an bawmh
Russia nih Ukraine a tuk cangka in US nih Ukraine cu $300 million leng man hriamnam tampi a bawmh colh. A bawmhmi pawl cu vanlawng, helicopter le tank kahnak missile pawl an si.
US bawmhmi hriamnam in Ukraine ralkap nih Russia vanlawng le helicopter tampi an kahthlak cang. Russia tank zong tampi an kah hrawh cang.
NATO chungtel a si vemi Germany, UK le ramdang pawl zong nih Ukraine cu hriamnam ṭhaṭha tampi an bawmh ve.
Ukraine ralzaam ting 20 hrawng an phan cang
Ukraine khua tampi cu Russia nih vanlawng, helicopter, tilawng le tank in missile le bomb torlecheng in a kah hna caah inn tampi an rawk i khuami 500 hrawng an thi cang.
Mah ruangah nu, ngakchia le tar vialte cu innpa ram ah an zaam thluahmah. Poland ram ah a zaammi lawng hi ting 10 leng (1 million leng) an si cang. Romania, Hungary, Moldova, Belarus, Russia, tbk ah 1 million hrawng an zaam ve.
Ukraine ram ahhin Judah miphun ting 2 hrawng an um ve i atu hi Israel nih a lak thluahmah hna. Nain, Ukraine ah khualtawng vanlawng luh a ngah lo caah innpa ram ah an zaam hmasa hau i a buaithlak ngai.
