US mirumpa nih Dallas Palik Sakhan ah helicopter a hlut

US dollar nuai thong tampi a ngeimi Pu Ross Perot Jr., kum 63 nih ‘fawi deuh in misual dohnak caah’ tiin Dallas Palik Sakhan ah helicopter a hlut.

Mirumpa nih a hlutmi hna helicopter cu ‘Bell 407 Helicopter’ a thar te si. A man fak taktakmi a chuak tharmi si.

Dallas Miohdaw Khanmah (City Hall) hmai ah helicopter cu a hung zuanpi i ‘mah hi kan hlut hna’ tiah siang taktakin muṭhai pek in a pek ko hna.

Palik sakhan ah helicopter a hlutu mirumpa hi US dollar nuai thong 3 le nuai 200 ($3.2 billion) hrawng a ngeimi mirum mangtara asi. Anih caah cun helicopter 1 cawk hi nang le kei nih tangka fang 10 hloh tluk asi.

Dallas Palik Sakhan Bawizik Eddie Garcia nih, “Ross Perot Jr. a chungkhar le Hillwood Aviation (amah company) nih siang tein laksawng a kan pekmi nihhin Dallas Khuami himnak tampi a bawmh lai,” tiah lunglawmhnak bia a chim.

“Dallas Palik nih misual dawinak ah mah helicopter hi kan hman chih cang lai caah fawi deuh le rang deuh in misual kan tlaih khawh hna lai.

“Mah nih hin Dallas Palik Sakhan kan thil ti khawhnak let tampi in a karhter lai,” ati.