US cozah nih uknak firtu Myanmar ralkap cozah cu fak deuh in dan a tat chap. Ralkap vuanci zung 2;
- Runvennak Vuanci Zung le
- Ramchung Vuanci Zung
le ralkap company 2;
- Myanmar Economic Corporation le
- Myanmar Economic Holdings Limited cu US company pawl nih “ralkap thilri” zuar hna lo dingin phihkhamnak (dantatnak) a tuah.
Ralkap nih sandahpiahtu mipi 1,700 leng a tlaih cang hna i 54 leng a thah cang hna ruangah US cozah nih fak deuh in dan a tat chap hi si.
Kan hnu thla zongah President Joe Biden nih uknak chuttu lutlai ralkap bawi pawl le Runvennak Vuanci le lunghring le leitang chuak cotu ralkap company 3 phihkhamnak a rak tuah cang.
US Chawlehnak Vuanci Zung nih, “Myanmar ralkap cu US chuak thilri tampi cawk kan kham cang,” tiah cathanh a chuah colh.
“Uknak chuttu lutlai pawl cu an tuahsernak theipar kan zunter peng hna lai. Tu hnu hmailei zongah phihkhamnak tuah chap dingin khua kan khan lio asi,” ati.
- Myanmar Economic Corporation le
- Myanmar Economic Holdings Limited hi ralkap company an si. Mah company he aa pehtlaimi company hme deuh pawl le dawr tam taktak an um.
Ralkap nih mah an company 2 hin beer, kuak, phone/internet, tires, leitang chuak cawh, innlo, tbk. chawhlehnak tampi rampumpi ah an tlaih dih. Mah ruangah ralkap bawi Min Aung Hlaing le a tapeh pawl an rum tuknak asi.
Myanmar ram chung palek vialte a uktu hi Ramchung Vuanci Zung asi. Mah vuanci zung nih hin social media i ralkap huatnak a chim/ṭialmi pawl ngiatnak thilri pawl US company sinah a cawk tawn, tiah theih asi.
Lamsul le Pehtlaihnak Vuanci Zung zong hi ralkap nih ramdang technology cawknak caah a hman tawnmi si caah US nih a phihkham ve awk si, tiah Justice for Myanmar phu biachimtu Yadanar Maung nih a chim.
“Cun, ralkap nih mipi a hrem chin lengmang hna nak hnga lo, vawlei cung ram vialte nih Myanmar ralkap hriamnam zuarh lo ding tiangin phihkhamnak an tuah awk si,” ati.
US nih a phihkhammi (dan a tatmi) cu zei dah santlaihnak um?
US nih a phihkhammi vuanci zung 2 le ralkap company 2 hi US thil chuak a caw tuk lomi an si caah zei pipa harnak an tong lai lo.
“US le Myanmar hi thil an i caw tuk lo, cucaah US nih a phihkham thawngin Myanmar ralkap nih harnak zei pipa a tong lai lo,” tiah US Chawlehnak Vuanci Zung rianṭuan hlun William Reinsch nih a chim.
“Ralkap bawi pawl an tangka vialte hi phihpiak hna sehlaw hmual a ngei deuh lai. Ralkap bawi vialte an tangka chuah kho lo dingin an phihpiak dih hna ahcun ralkap thazaang ṭhawnternak thilri le an duhmi thil an caw kho theng lai lo,” ati.
US cozah nih Myanmar ralkap company cungah a fak bikmi phihkhamnak a tuah khawh rihmi cu;
- US rammi hohmanh nih ralkap company he thil i cawk/zuarh lo ding (US minung sin in ralkap sinah tangka fang 1 hmanh luhter lo) le
- Ralkap company pawl cu US bank hmang kho loin tuah hi an si. Hi tiang phihkhamnnak hi US cozah nih a tuah rih lo.
