Taiwan hi China nih ralkap thazaang in a tuk ahcun US ralkap nih Taiwan ven khawhnak thazaang kan ngei tuk, tiah US ralkap bawizik Joint Chiefs of Staff Chairman Mark Milley (hmanthlak) nih tuni ah a chim.
Nain, China ralkap hi liamcia kum tlawmpal te chungah technology lei tamtuk a ṭhangcho ve, tiah ralrin a herhnak kong a chim — Naite zong ahkhan China nih vawleipi a cul khomi a thawng nakin let 5 a rang deuhmi missile a hneksak.
US ralkap bawizik Milley nih, “China nih Taiwan hi ralkap thazaang in a tuk lai ti ka rak ruat bal lo,” tiah Aspen Security Forum ah a chim.
“Sinain, hmailei ni khatkhat ah China nih a duh ahcun ralkap thazaang in Taiwan tuk te dingin aa timtuah cuahmahmi a lo,” ati.
“China nih Taiwan a tuk ahcun US ralkap nih Taiwan nan veng kho lai maw?” tiah an hal.
Taiwan cu hlan lio ahcun China ram a rak si. China ram buainak ruangah nihin tiang amah tein a dir nain China nih cun a ram chung state pakhat bantukin a zoh peng. A herh ahcun ralkap thazaang in hramhram in lak dingin a tlerh peng.
“US ralkap cu, a herh ahcun vawlei pumpi ah zei paoh tuah khawhnak thazaang kan ngei tuk henta.
“Taiwan ven khawhnak thazaang kan ngei tuk. Hi cu hal hmanh a hau lo.
“China nih Taiwan hi lak a timh lehlam ahcun US nih a herhmi paoh tuah dingin policy kan ngei peng ko.
“China le Taiwan fonh/lo kong cu ralkap thazaang in si loin kap hnih mipi duhnak zoh in cabuai cung biaruahnak in tawlrel ding asi.
“Ral thawh lo tein a phi chuah ding hi kan duhmi cu asi,” ati.
‘Hypersonic’ tiin auhmi a thawng nakin let 5 a rang deuhmi bomb/missile
Milley nih, “Liamcia kum 70 chung cu US le Russia hi ṭihnung bik nuclear hriamnam a ngeimi kan si i kanmah 2 hi biatak tein kan i zuam peng,” tiah a chim.
“Nain, liamcia kum tlawmpal hrawng cu China nih biatak tein a ralkap thazaang a ser i technology lei zong tamtuk a ṭhancho caah atu cu kanmah ram 3 hi kan i zuam cang i a buaithlak chinchin cang.
“August thla ah China nih nuclear-bunh khawhmi a thawng nakin let 5 rang deuhmi hypersonic missile a hneksak, mah hi niam tein vawlei a hel khomi missile asi i liamcia kum 1957 ah Russia nih Sputnik a rak thlah lio tluk dengmang in khuaruahhar asi ve,” ati.
Sputnik cu Russia nih avoi 1nk bik cuṭuh a rak thlahmi asi. Mah hi minung nih avoi 1nk bik cuṭuh an rak thlahmi asi. US cozah a thin a rak phang tuk i biatak tein aa zuam hnu atu ahcun aa khingkhang bak an si cang — cu bantukin hypersonic missile hi atu ah zei ram hmanh nih an ngei rih lo nain US, Russia le China nih an hneksak cuahmah cio lio, chanthar hriamnam ṭha bik asi.
“China nih hypersonic a hneksakmi hi ‘thil ngan tuk asi’, technology lei ah China a ṭhancho tukmi a langhter.
“Mah ruang cun, China cu vawlei cung ram ṭhawngbik cazin ah aa tel ve cang i Vawlei Ralpi 2nk hnu in tutan hi ram ṭhawng bik kan hung tam deuh hramthok bik asi caah i entainak a tam deuh chin lengmang kho men.
“Cucaah, vawlei ah daihnak a len khawhnak hnga ram ṭhawngbik kan si peng a biapi tuk, tiah ka ruah,” ati.
