Kawl Ralkap ukmi biaceihzung nih tuni ah US thawngla Danny Fenster cu kum 11 thong dan a pek. US cozah nih thlahter dingin aa zuam lenmi asi, Kawl Ralkap nih a power a piah ruah ti awkin.
Fenster, kum 37 cu Frontier Myanmar thawngzamhca ah managing editor a ṭuanmi si.
“Lahwahkah upadi i buainak chuahter le phungninglo bu upadi na buar….” tiin kkum 11 thong dan an pek hi si. Frontier Myanmar thawngzamhca nih, “Mah upadi a fak bikmi dantatnak an pek,” ati.
Liamcia kum tlawmpal chungah Myanmar nih nitlaklei ram thawngla thong a thla bal hna lo. Fenster hi avoi 1nk bik asi.
Frontier Myanmar editor-in-chief Thomas Kean nih, “Danny Fenster nih mah upadi hi a pelte hmanh a buar lo,” tiah a chim.
“Tuni ah biaceihzung nih hitin bia a chah cu Frontier Myanmar rianṭuan vialte kan lungrawk tuk hna. A rannak in thongin chuak sehlaw US a chungkhar sinah tlung kho colh seh ti kan duhpiak cio,” ati.
Fenster cu May thla ahkhan US kir aa timh lio ah Kawl Ralkap nih an tlaih i Yangon um Insein Thong ah an thlak.
Thlah dingin a chungkhar nih an hal peng .
Tu zarh thokka ah, a chiakha deuhmi ralhrang le ram ṭhencheunak upadi in taza an cuai chap. Mah upadi pawl hi kum 20 cio thongthlak khawhnak upadi an si.
Fenster biaceihzung ah a kong an ceih lio cu Kawl Ralkap cozah nih mipi sinah a langhter lo.
US Ramdang Vuanci Zung nih, “Myanmar ralkap nih Fenster an tlaihmi hi zeihmanh sullam um lomi si, zei sualnak hmanh a tuah lo. A rannak in thlah hna seh…,” ati peng nain Kawl Ralkap nih zeihmanh a rel lo. Tuni ah kum 11 thong dan a pekmi hoi hna hi cu US cozah a serhsat mi alo.
Kawlrammi thawngla zong tampi an tlaih hna.
Myanmar ram cu ralkap nih an rak uk peng caah pumpak media an rak um kho bal lo. Kum 2011 hnu ceu in zalonnak tlawmte a hung um i pumpak media tampi an hung um.
Kawl Ralkap nih uknak an fir thokin ramchung media thawngla tam taktak a tlaih cang hna.
Sandahpiahmi mipi 1,200 leng zong a thah cang hna.
