Vawlei mirumbik Pu Elon Musk, kum 50 nih ‘ka Tesla share 10% ka zuar lai maw?’ tiin online ah mipi bia a khiahter hna – a Tesla share 10% cu $20 billion leng man asi.
US mipi cheukhat nih, “Sifak santlai lo pawl hmanh nih ngunkhuai/tax kan pek lio ah mirum tumtlang pawl an pe lo, tax an hrial…” an ti lengmang.
Cucaah vawlei mirumbik Pu Elon Musk nih, “Tangka ka hmuhmi tampi hi catlap cung lawngah asi i a tangka taktak asi lo. Hihi tax hrial ah an ruah tawn, cucaah tax peknak caah ka Tesla share 10% ka zuar lai ka ti. Nan lungtling maw?” tiin Twitter ah poll a tuah i online ah mipi a vote ter hna.
US upadi ningah, share/stock ah invest tuah in hmuhmi (catlap cung lawngah hmuhmi, a tangka taktak um rih lomi) cu tax pek asi lo. Na share Na zuar i a tangka taktak na chuah tik lawngah pek asi.
“Mah poll phichuak hi ka zulh lai, zei bantuk phicuak asi paoh ah ka zulh lai.
“Theihternak, khuazei hmanh in tangka lahkhah le bonus ka ngah lo. Share/stock lawng ka ngei, cucaah stock ka zuar lawngah tax a pe ding ka si,” ati.
A follower minung 63 million chungah 3.5 million leng nih an vote i 58% nih ‘zuar ko, kan lungtling’ an ti.
Pu Elon Musk cu a company Tesla sipuaizi a ṭhangcho tuk i Tesla share man a kai tuk, $1,222.09 bak a phan, cucaah atu hi $338 billion a ngei, tiah Bloomberg nih tuni ah a langhter.
Amah changtu, vawlei mirumbik 2nak Pu Jeff Bezos cu $136 billion bakin a lawnh.
Pu Elon Musk nih Tesla company share a ngeihmi dihlak chungah 10% cu $20 billion leng man asi, tiah Forbes nih a langhter ve.
$20.8 billion chung ahcun zeizat dah tax a pek lai? Mah hi hmet law rel khawh asi.
