US President Joe Biden nih, “US ram ah COVID-19 zawtnak karh kham dingin kakuaisi 200 million kan cah chap. States kip ah kan kuat thluahmah hna lai,” tiah a thanh.
“Pfizer le Moderna sinah 100 million veve kan cah. Hmasa cozah (Trump) nih a cawkmi pinah a thar in 200 million kan cah chap hi si. Kan kut cun a phan rih lo, nain kan cah cang.
“June thla (summer) ahcun a phan thluahmah lai i state kip ah kan kuat thluahmah hna lai. July thla dongh ahcun a phan dih lai.
“Hmasa cozah nih kakuaisi a cawkmi hi 400 million asi. Atu he cun 600 million asi cang lai. US mipi 300 million kan chunh khawh dih hna lai,” ati.
COVID-19 kakuaisi cu voi 2 chunh a hauh caah an ram milu nakin let 2 tam deuh an cah hi si. US ram ah minung 330 million hrawng an um, nain naupawi le ngakchia cu kakuaisi chunh awk an ṭha lo.
Biden cu kan hnu zarh lawngin president ṭuan aa thokmi si ko nain, atu hi US ram ah COVID-19 rungrul (virus) a ci aa thlengmi um i chawnh a fawi deuh caah a ran khawh chungin doh aa zuam.
Trump nih state pawl zarh 1 ah kakuaisi 8.6 million peng a kuatmi hna zong kha Biden nih 10 million peng kan in kuat cang hna lai, tiin tuni ah state cozah hruaitu (governor) pawl a chimh hna.
Atu hi US ram ah COVID-19 zawtnak in minung ting li le thong kul le thong khat (421,000) leng an thi cang. Chin state pumpi minung dihlak zat an thi cang tinak asi. Zawtnak aa chawnmi ting zahnih le ting sawmnga (25 million) leng an si cang. Singapore, Israel, New Zealand le Norway rammi dihlak fonh nakin an tam deuh cang.
Biden nih, “atu in April thla dongh tiang hmaihuh (mask) kan i hruk cio ahcun, minung 50,000 nunnak kan khamh khawh lai tiah sii lei thiamsang hna nih a kan chimh,” ati.
Trump cu mask hruk a rak duh lo caah fak piin soisel a rak tong. US lawng si loin South Korea, Malaysia le ramdang sibawi thiamsang tampi zong nih an rak mawhchiat i amah ruahnak petu Dr. Fauci zong nih a rak mawhchiat.
Biden nih, “kakuaisi chunh a duhmi paoh cu September thla ahcun nan i chun kho dih cang lai ti ka zumh.
“Nain, kan ram ah hi zatzat kakuaisi hi atu tluk hnawhnam in kan kua bal lo i kan chunh bal lo caah kan ruah ning tlukin a fawi lo kho men,” ati.
