Tuni khuadei hlan ah, Shan state, Lashio peng um palek sakhan 1 cu ‘Ṭangṭi Unau’ miphun hriamtlai phu 3 nih an kah i palek 14 an thah hna, adang 2 an tlau.
Palek sakhan cu Naung Mon khuate ah a ummi si. Palek chungkhar 5 hrawng zong hliam an tuar, tiah thil sining a hmutu nih The Irrawaddy media ah a chim.
Ṭangṭi Unau (Brotherhood Alliance) aa timi miphun hriamtlai phu 3;
- Ta’ang National Liberation Army (TNLA) le
- Arakan Army (AA) le
- Myanmar National Democratic Alliance Army (MNDAA) nih an kah hna, tiah a chimchap.
TNLA biachimtu Mai Aik Kyaw nih, “Mahka hmun ah a ummi kan ralkap pawl he kan i chawn kho rih lo, cucaah kanmah kahmi asi/lo ka fehter kho rih lo,” tiah The Irrawaddy sinah a chim.
Ṭangṭi Unau phu 3 nih kan hnu zarh ah, “Ralkap nih sandahpiahtu mipi na thah peng hna ahcun mipi kan bawmh hna lai,” tiin uknak firtu ralkap ralrin an pek hnu ah tutan hi avoi 1nak an kah tatkak asi.
Khuadei hnu ah, Myanmar ralkap pawl nih Naung Mon le pawngkam um Naung Kwe khuate an luhhnawh i mipi an hrem hna caah khuami 300 leng ramtang ah an zaam.
“Khuadei laite ah hriamtlai phu 3 nih palek sakhan cu an kah. Palek sakhan cu a kaang dih,” tiah khuami pakhat nih a chim.
Nai hrawng cu, ralhrang Myanmar ralkap nih sandahpiahtu mipi a thah tuk hna caah Kachin Luatnak Ralkap (KIA) le Karen Miphun Bu (KNU) nih Kachin, Shan le Bago ah ralkap le palek an kah peng ve hna.
February 1 ah ralkap nih uknak a fir hnu in palek zong nih mipi an tukvelh, hrem le thah hna. Atutiang ah ralkap le palek nih sandahpiahtu mipi 618 leng an thah cang hna.
