NUG cozah biachimtu Dr. Sasa nih, “Tuni ah Yangon ah buaibai lo tein sandahpiah mipi cu ralkap nih chiakha taktak in an ṭhuat hna i minung 5 an thah hna,” tiah a chim.
“Ramdang nih atutiang hma an lak bal lo caah lainawng ralkap bawi pawl an ralṭha chin lengmang. Hohmanh nih dan a kan tat kho lo tiin zalong taktakin sualnak fihnung an tuah chin lengmang.
“Ni fatin te hi, buaibainak a tuah lomi Myanmar mipi hna chiakha taktak in ralkap nih an tuahto peng hna.
“UN nih UN ralkap kan thlahpiak, Myanmar ram ah vanlawng zuannak nawl phit, hriamnuam zuar phit, sipuaizi vialte phit dih law NUG cozah hi phungning tein kan cohlang, tiin atu le tu voi tampi kan hal peng nain nihin tiang aphi chuak um lo.
“Mah ruang ahhin dahkaw, Myanmar mipi cu duh zong duhlo zongah anmah tein an chungkhar an i ven cu. Thim awk dang zeihmanh an ngei ti lo.
“Kan tei ṭi lai. Dinnak nih a tei hrimhrim lai,” ati.
Acunglei bantukin a chim hnu ah official cathanh a chuah chap
Cathanh ahcun, “Myanmar cozah caah NUG maw aa tlak deuh SAC dah tiin ramdang nih nan kan zoh i nan hngah.
“Tatte zeizat remruam dah nan herh? tiah hal kan duh hna. Uknak chuttu ralkap hi cohlan awktlak cozah asi lo zia ramddang nih tatte zeizat dah nan herh rih?
“Ralkap cu mipi caah rian a ṭuan lo pinah mipi zong a veng hna lo. Second 1 hmanh i ruat ta loin an thah thluahmah hna. Luatnak an fih tuk i luatnak duh in sandahpiahmi paoh cu an thah hna lole an kutka le ruhkhua rawk dihlak in an hliam hna. Hi tluk tuksapur hi Myanmar mipi nih zei can remruam dah an tuar rih lai?
“Ralkap nih mipi zeizat an thah hna hnu ah le inn zeizat an khangh hnu ah dah Vawlei Biaceihzung (ICC le ICJ) nih hma nan lak te lai? Zeizat dah that rih hna seh ti nan duh?
“Myanmar mipi nih zeitik hmanh ah uknak chuttu lainawng ralkap hmai ah kan lukhun bal lai lo. A sung kan khan lai lo. Kan ram ah hrem uknak a hram kan bongh hlan lo kan i din lai lo, hnulei kan kir lai lo.
“A ṭhangchomi, ral um lomi, miphun le biaknak le holh thleidannak um loin upadi tangah miphun le biaknak vialte zalong tein an ṭhanchonak federal ram kan ser lai.
“Hihi kan i tinhmi le kan biakamnak asi. Hihi a tlamtlin khawhnak hnga ramdang nih an kan dirkamh ciote ko lai tiah kai ruahchan,” ati.
