CNA biachimtu Salai Htet Ni nih, December 17 dei lai 3am hrawngah Chin state, Tedim peng, Ngawsing khuate pawng ah CNA le CDF-Hualngo ralkap nih ZRA an kahmi hna kong bia fiang a chim cang.
ZRA nih CNA le CDF doh dingin ralhrang Myanmar ralkap aa sawm caah kanmah nih kan tongh hmasa mi hna asi. Pastor le a chungkhar an tlaih kalpi hna an timi kha cu an lihmi si, CNA nih mah bantuk kan tuah lo. Mipi nih CNA huat hna seh tiin lih an phuahmi si lai, tiah Salai Htet Ni nih a chim.
CNA biachimtu Salai Htet Ni nih, “CNA le CDF-Hualngo nih ZRA kan kah hna hlan December 15 ah Haimual khuate ah ZRA le Myanmar ralkap tonbiaruahnak an ngei,” tiah a chim.
“ZRA le Myanmar ralkap i bawm in CNA doh an kan timh tiah thawngpang kan theih. Mah ruangah kanmah nih kan kah hmasa mi hna asi.
“Kanmah lei ah ra hna hlah seh tiin kan kahmi hna asi. Mahka hi CNA sakhan umnak Zimte khua pawng asi.
“Haimual khua ah CNA nih pastor an tlaih kalpi tiin an kan puhmi kha cu an lihmi si. CNA nih mah bantuk kan tuah lo. Mipi nih CNA huat hna seh tiin lih an phuahmi si lai.
“Anmah lei hi ralkap 20 in 30 kar hrawng an si tiah kan theih,” ati.
ZRA nih cun, “CNA nih ngakchia pate an tlaih i Ngawsing khuate luhnak phawh caah an i kalpi. Haimual khua ah Pastor Laang le a chungkhar le chungkhar dang pakhat an tlaih kalpi hna i vual cikcek in an hrem hna hnu ah an hung chiah hna. Caan tlawmpal a rauh hnu ah Pastor Laang le a chungkhar cu an tlaih kalpi ṭhan hna i atutiang an umnak kan hngal lo.
“ZRA ralkap an riahnak inn an kah caah sualnak ngei lo inn ngeitu 2 zong hliam hma an tuar. CNA le a ṭanṭi hriamtlai phu pawl cu ralhrang bantukin an cawlcangh caah NUG, ASEAN le UN sinah kan report hna,” ati. Mah hi hmet law rel khawh asi.
CNA biachimtu Salai Htet Ni nih a chimmi hi a dik ahcun ZRA hi a hrokhrawl pinah a chiakha taktak tinak asi.
Haimual le pawngkam khuami nih an chim ningah, December 15 ah ZRA ralkap pawl cu Haimual khua ah an um. A thaizing December 16 ah CNA le a ṭanṭi hriamtlai phu pawl cu Haimual khua lei ah an kal.
ZRA cu India ram, Manipur state ah hrambunhmi asi. India cozah he remdaihnak sachoh minsen an thut i India-Myanmar ramri ah ramri hngak bantukin a cawlcangmi si.
Karen state i ramri hngak aa timi hriamtlai phu BGF le ZRA hi aa lo bakte an si. Ralhrang Myanmar ralkap an doh lo pinah, ralhrang lei ah an ṭang i ralhrang dotu mipi an doh hna.
ZRA nih ralhrang Myanmar ralkap a dotu PDF sakhan 3 bakte a hrawhpiak cang hna. Tangka ting za tampi man PDF/CDF rawl, thilri le hriamnam a hrawhpiak dih hna.
A hrawhpiakmi sakhan 3 lakah CDF-Hualngo sakhan zong aa tel ve. Amah ZRA nih duh tawk in CDF le PDF sakhan a hrawh piak hna hnu ah CNA nih atu voi 1 ah a hung kah i a au khawh ning le ai hro khawh ning hi cu …
Ref: Zalen
