France President Emmanuel Macron cu Russia President Vladimir Putin he an i ton lai ah Russia nih COVID test an timh i a duh lo.
Cucaah, Nikhatni ah an i ton (hmanthlak) cu kut an i tlaih lo pinah pe 13 a kaumi cabuai kil veve ah hlat takin an ṭhu.
France President cu amah sibawi nih France in aa thawh lai le Russia a phak hnu ah voi 2 tiang COVID a test ko nain Russia nih anmah test thengte a duh.
Nain, Russia nih an ka test ahcun Russia cozah nih ka DNA a ngeih lai ati caah a duh lonak hi si.
Russia cozah nih, “Mah nihhin an biaruahnak zeihmanh a hnorsuang lo,” tiah a chim.
Zei ruang dah Russia sinah COVID test a duh lo?
Liamcia kum 10 hrawng khan, cozah sungṭhoh pawl nih ramdang hruaitu pawl an lungput/ziaza le thil pakhatkhat um tikah zeitin dah hma an lak lai ti hi biatak tein hngalh khawh an i zuam. Cu an hngalh khawhnak ding ahcun an ngandamnak kong hngalh hmasa an i zuam.
An DNA an ngeih ahcun liamcia caan, atu lio le hmailei an ngandamnak kong tampi an hngalh khawh i an ziaza/lungput an ruahdamh khawh.
US cozah nih, “China cozah nih minung tampi DNA a khomhsuat thluahmah caah nan DNA mi sin phakter hlah uh. DNA cu credit card bantukin mi nih an fir tikah adang in thlen khawh asi ti lo,” tiin mipi ralrin peknak thawng a rak thanh bal.
US cozah zong hi liamcia kum 10 lio ahkhan, ramdang hruaitu pawl DNA na lak, tiin an rak mawhchiat bal ve.
Chim duhmi cu, DNA hi sungṭhoh pawl nih an ral takmi (ngeih an i zuam tukmi) asi.
