Australia Ramdang Vuanci Zung nih, “Myanmar ram ah COVID-19 boruak a chia chin lengmangmi dohnak caah $4.5 million kan bawmh lai,” tiin thawng a thanh.
Bawmhnak tangka cu Myanmar ralkap cozah sinah pek loin UN sinah an pek lai i UN nih Myanmar ram chung COVID-19 dohnak caah a hman lai.
Australia cozah nih, “Tangka cu COVID-19 mizaw lakhruak thlopnak thilri le sii ai cawknak le COVID-19 karh khamnak caah UN nih a hman lai,” ati.
“Myanmar ram pulrai le ramkhel ruangah a thluak hman lomi pawl thlopbulnak ca zongah an hman lai,” ati.
Myanmar boruak kong hi Australia cozah sinah biatak tein kan chimpiak… tiin Australia ram, Western Australia state khualipi Perth um Pu Renny Ceu Lian Mang te nih Senator Dean Smith an ton lengmang i amah nih hin cozah sinah a chimrel piak tawn hna — Mah bawhnak kan hmuhmi hi amah chim rel piaknak tampi aa tel ve ti khawh asi.
Senator Dean Smith nih, “Myanmar rampumpi boruak a chiat tuk caah Australia cozah nih tam deuh in bawm tiin liamcia thla tampi chung kha Western Australia state le state dang um Myanmar miphun nih Australia cozah an forhfial peng.
“Atu ahcun, Ramdang Vuanci nih Myanmar ram COVID-19 pulrai dohnak caah $4.5 million kan bawmh chap lai tiin thawng a thanh cang i kaa lawm tuk,” tiah a chim.
Senator Dean Smith hi Australia um Chinmi hna nih an herhnak paoh ah bawmh an hal tawnmi le cozah sinah bawmh a kan halpiak lengmangtu asi.
2018 January thla zongah Pu Renny Ceu Lian Mang nih Laitlang (Chin state) ah a rak tlawnpi i Hakha le Thantlang ah CHRO le Chin upa pawl a rak ton hna.
UNHCR nih ‘Malaysia um Chin ralzaam pawl cu an ram a ṭhat cang caah ram thumnak kal an hau ti lo, tlung cang hna seh…’ tiin thawng a rak thanh i Malaysia um Chinmi 50,000 hrawng lungrawk tukin kan rak um lio 2019 zongah Pu Renny Ceu Lian Mang le Pastor Ca Lian Thang nih Senator Dean Smith cu Malaysia ah an rat pi i UNHCR le Australia Tanzung an rak ton hna i Chinmi ram thumnak kalter rih hna dingin an rak nawl. Malaysia um Chin ralzaam bu CRC, ACR, FRO, tbk le CHRO le US um Chin upa pawl zong nih UNHCR an rak nawl. Mah hnu ah UNHCR nih Chinmi cu ralzaam ah a kan cohlan ṭhan.
Tuni a linsa mi thawngpang pawl;
- Laitlang thawngpang: Mindat-Matupi lam ah ni 2 chungah ralhrang 26 an thi
- Thlapa dawpdolh – November 19 ah thisen bangin thlapa a sen lai
- US ralkap nih Taiwan hi ‘China kut in kan ven khawh tuk’
- Ralkap nih Thantlang ah inn 4 an khangh than — hmet law relchap
- Hakha ah CNA/CDF nih Kawl Ralkap le palik 11 an thah hna
- Myanmar ralkap company Mytel cu mipi nih an doh caah thla 3 chungah $2 million deng a sung
- Australia um Kachin kan unau nih Thantlang le Mindat caah tangka ting 30 a kan bawmh
- Malaysia nih minung fir hmang Myanmar rammi 3 a tlaih hna
- Australia um Kawl Doctor 2 nih CDF bawmhnak an pek
